מיט פרייד איז געמאלדן געווארן איבער די עפענונג פון א נייע ישיבה קטנה אין שטאט מאנסי, ישיבת "אהבת התורה" ראחמיסטריווקא, בנשיאות כ"ק אדמו"ר מראחמיסטריווקא מאנסי שליט"א, אשר ידיו רב לו במערכת החינוך, וועלכער וועט משפיע זיין מזיו תורתו אויף בחורי חמד תושבי העיר.
דער רבי שליט"א איז ממשיך דעם דרך החינוך פון זיין גרויסן פאטער כ"ק אדמו"ר הרה"ק מראחמיסטריווקא זי"ע, וועלכער האט פאר לאנגע יארן געדינט אלס ראש ישיבה און געשטאנען אין שפיץ פון די מוסדות החינוך אין שיכון סקווירא, און שפעטער שוין אלס רבי מדריך געווען טויזענטער חסידים בדרך התורה והחסידות אויף א פערזענליכע פארנעם.
דער רבי שליט"א איז שוין לאנגע יארן א מחנך און מרביץ תורה, צוערשט אין סקווירא שטעטל וואוינענדיג דארט אלע יארן בצל חותנו כ"ק אדמו"ר מסקווירא שליט"א, און אזוי אויך האט דער רבי פאר לאנגע יארן אנגעפירט די ראחמיסטריווקא כולל אין מאנסי, און אצינד טוט דער רבי עפענען א אייגענע ישיבה קטנה פאר בחורי חמד צו משפיע זיין פאר זיי תורה וחסידות.
די נייע ישיבה וועט עפענען אירע טויערן דעם קומענדיגן זמן הלימודים, ראש חודש אלול תשפ"ד, צום ערשטן הילולא קדישא פון הרה"ק מראחמיסטריווקא זי"ע, וואס געפאלט ביום כ"ט אב ערב ר"ח אלול, אלס ראש ישיבה איז געווארן אויפגענומען הרה"ג ר' יודל געלדצעהלער שליט"א.
