א שווערע בשורה איז היינט אנגעקומען פון ירושלים עיר הקודש, איבער די פריצייטיגע פטירה פון הגאון רבי יהודה דרעי זצ"ל רב פון באר שבע, און מחבר ספר אמרי יהודה און אבני עזר, וועלכער איז היינט נאכמיטאג אין ארץ ישראל נפטר געווארן אין עלטער פון 67 יאר, נאך א שווערע קרענק וואס האט אים באטראפן אין די לעצטע תקופה.
הגאון רבי יהודה ז"ל איז געבוירן געווארן אין מאראקא וואו ער איז אויפגעוואקסן אין זיינע יונגע יארן, שפעטער האט ער געלערנט אין די בארימטע ישיבה פורת יוסף אין ירושלים, וואו ער איז געשטיגן בדרכי התורה והוראה, אזוי אויך האט ער געלערנט אין ישיבת עטרת ישראל, וואו ער איז געווארן א תלמיד מובהק פון הגאון הגדול רבי ברוך מרדכי אזרחי זצ"ל ראש הישיבה.
נאך די חתונה איז ער אויפגענומען געווארן אלס רב און ראש הכולל אין די רמות געגנט אין ירושלים, און פאר די לעצטע קרוב צו דרייסיג יאר האט ער משמש געווען ברבנות אין באר שבע, וואו ער איז געשטאנען אין שפיץ פון אלע רוחניות'דיגע אקטיוויטעטן אין שטאט.
ער איז געווען א גאון מופלג און מחבר געווען פילע ספרים, ספר אמרי יהודה, שאלות ותשובות משנת עזר, חגים וזמנים, וזאת ליהודה, און נתיבי הוראה. אזוי אויך פלעגט ער פארהערן תלמידים און זיי מדריך זיין להוראה, איבערהויפט אין די לעצטע פאר יאר ווען ער איז געווען צווישן די הויפט בוחנים ביי די גרויסע פארהערס בחצר הקודש גור.
די לוויה קומט פאר היינט נאכט 8:00 ביי ישיבת פורת יוסף אין די גאולה געגנט אין ירושלים, אויפן וועג בית החיים סנהדריה.
