אין ליכט פון א רייע שווערע טראגעדיעס און שרעקליכע אבידות וואס די בעלזא קהילה אין בארא פארק האט געליטן אין די לעצטערע חדשים, איז באשטימט געווארן דורך די הנהלת הקהילה, בהסכמת כ"ק אדמו"ר מבעלזא שליט"א, אז דעם מאנטאג ערב ראש חודש אלול וועט פארקומען א גרויסע עצרת חיזוק והתעוררות, פאר כלל חסידי בעלזא אין בארא פארק.
צווישן די שווערע אבידות ציילט זיך די פריצייטיגע פטירה פון הרה"ג ר' אברהם שפירא ז"ל, בן להבחל"ח כ"ק אדמו"ר מנאראל שליט"א, די שרעקליכע עקסידענט מיט צוויי וואכן צוריק, ווען האברך החשוב ר' ישראל שלום אשרי ע"ה איז טראגיש נפטר געווארן רח"ל, די טראגישע פטירה פון א עלטערע פארפאלק למשפ' שפערבער ע"ה, און די פטירת פון הרב החסיד ר' משה לעממער ע"ה, און הרב החסיד ר' חיים יעקב קאטה ע"ה.
די גרויסע עצרת חיזוק והתעוררות וועט פארקומען מאנטאג נאכמיטאג ביום המסוגל פון ערב ראש חודש אלול, אינעם ריזן זאל בבנין תלמוד תורה דחסידי בעלזא אויף די אכט און דרייסיגסטע סטריט, מען וועט זאגן פרקי תהלים און יום כיפור קטן, און הערן דברי חיזוק והתעוררות מפי מגידים מפורסמים.
