היינט מיטאג איז אויסגערופן געווארן אין היכל ישיבת רבינו חיים בערלין אין פלעטבוש, אז עס ווערן אויפגענומען נייע ראשי ישיבה אויפן פלאץ פונעם אומפארגעסליכן ראש ישיבה הגאון הגדול רבי שלמה חליווה זצ"ל, וועלכער איז ל"ע פריצייטיג אוועקגעריסן געווארן פארלאפענע וואך אין בליענדן עלטער פון 66 יאר, בלויז א קארגע יאר זינט די פטירה פון זיין גרויסן שווער הגאון הגדול רבי אהרן שעכטער זצ"ל ראש הישיבה.
היינט מאנטאג ככלות השבעה האט דער לאנגיעריגער מגיד שיעור אין ישיבה הרה"ג ר' חיים קיטעוויץ שליט"א אויסגערופן בשם די הנהלת הישיבה און די ראשי הכוללים, אז עס ווערן אויפגענומען צוויי ראשי ישיבה אויפן פלאץ פונעם ראש ישיבה זצ"ל, בנו חביבו הגאון רבי יוסף חליווה שליט"א, און זיין איידעם הגאון רבי צבי פינק שליט"א.
ביידע נייע ראשי ישיבה זענען שוין לאנג אקטיוו אינערהאלב די הרבצת התורה אין ישיבה, און שטייען אין שפיץ פון די ישיבה כולל גור אריה. אצינד וועלן זיי אינאיינעם איבערנעמען די לייצעס און ווייטער מרביץ תורה זיין און אויפשטעלן תלמידים נאמנים, אין דעם ישיבה וואס גייט שוין אן פאר אריבער הונדערט און צוואנציג יאר נאכאנאנד כולן שוין לטובה.
