ווי באריכטעט נעכטן איז געפאלן שטיקער פון א ראקעט הארט נעבן די עיר התורה והחסידות בני ברק, ביים גרעניץ פון שטאט מיט די פרייע רמת גן געגנט, וואו עס האט פאסירט שווערע שאדן אין רעזולטאט פון די אטאקע.
היינט דינסטאג זענען די רבני העיר בני ברק הגאון הגדול רבי חיים יצחק אייזיק לאנדא שליט"א און הגאון הגדול רבי שבח צבי ראזענבלאט שליט"א, ארויסגעפארן צו יענעם ארט ביים גרעניץ פון שטאט צו באטראכטן די שאדן פון דער נאנט, און דערביי באקוקן די עירוב וואס לויפט אויף יענע גאס.
צו יעדנס וואונדער האט מען געזען אז די עירוב שטריקן זענען גארנישט געשעדיגט געווארן, טראץ וואס אויפן זעלבן פלאץ זענען געווען אויסגעשאסענע פענסטער און אנדערע שאדן. די רבנים האבן באלד געזאגט אז מען זעהט אז שמירת שבת באהיט די שטאט פון אלעם בייזן.
