א פרישע רינגעלע האט זיך היינט געעעפנט אין די ברייט פארצווייגטע מערכה וואס אידישע קינדער זענען עוסק איבער די גזירת החינוך, אפצושלאגן די שווערע גזירה און באקעמפן מיט ציין און נעגל, די וואס פרובירן צו אריינרעדן אין די חינוך הטהור וואס אידישע קינדער געבן איבער דור אחר דור.
די פערל'ס ארגענעזאציע וואס איז אקטיוו אויף פארשידענע פראנטן אפצושלאגן די גזירה, האט היינט אריינגעגעבן א פרישע קלאגע אין די פעדעראלע אפטיילונג פון ציווילע רעכטן, דירעקטירט קעגן די עדיוקעישאן דעפארטמענט פון ניו יארק סיטי און ניו יארק סטעיט, מיטן קלאגע אז זיי דיסקרימינירן דירעקט קעגן אידן, און לייגן ארויף אומלעגאלע צוימונגען אויף די היימישע ישיבות, נאך ארגער ווי די פאבליק סקולס לענגאויס ניו יארק.
די קלאגע מיט א רייע דעטאלן דערונטער, נעמט אריין די פאקט אז די עדיוקעישאן דעפארטמענט פירט זיך אויף אומלעגאל קעגן אידישע סקולס, אין די צייט וואס די פאבליק סקולס ווערן נישט אזוי נאכגעקוקט מיט פארגרעסערטע גלעזער, דאס זעלבע איז מיט די אויסרייד אז מען טאר נישט לערנען מיט די קינדער אין אנדערע שפראכן, אין די צייט וואס אין די פאבליק סקולס איז עס יא ערלויבט.
די קלאגע איז אריינגעגעבן געווארן דורך די הנהלה פון עטליכע גרויסע מוסדות התורה אין ניו יארק, מוסדות סאטמאר, מוסדות באבוב, מוסדות חב"ד, און מוסדות צעהלים.
