זייענדיג צוגאסט אין בארא פארק אויף א גרויסע שבת, אינאיינעם מיט פילע תלמידי וחסידי סאטמאר פון נאנט און ווייט, איז כ"ק אדמו"ר מסאטמאר שליט"א ערשינען דעם מוצאי שבת אויף א באזוך אין די הערליך איבערגעבויעטע בית המדרש דקהל יטב לב ד'סאטמאר אויף די צענטע עוועניו אין בארא פארק.
די בית המדרש וועלכער איז באקאנט אין סאטמאר אלס נאסטאלגישע ווענדפונקט פון חסידי סאטמאר אין בארא פארק, א מקום קדוש וואו פילע חסידים ואנשי מעשה זענען קובע מקום לתורה ולתפילה שוין לאנגע יארן, איז אין די לעצטע תקופה אריבער העפטיגע רענאוואציע ארבעט לפאר ולרומם את בית השם, איבערהויפט פון אינעווייניג וואו מען האט גענצליך איבערגעמאכט דעם צורת הבנין צוצוברענגען פיל הרחבת הדעת פאר די חשובע מתפללים.
אצינד צום הויכפונקט פון הרחבת גבולי הקדושה, איז דער סאטמארער רבי שליט"א אנגעקומען אויף א באזוך אין בית המדרש, דער רבי האט קובע געווען א מזוזה און מכבד געווען די חשובע נדיבים בעם, דערנאך געפראוועט א מסיבת לחיים און ווארעם געוואונטשן פאר די עסקנים און גבאי הביהמ"ד, מען זאל קענען ווייטער ממשיך זיין דעם קול תורה ותפילה בין כותלי בית המדרש הדין מיט גרויס הרחבת הדעת.
