א היסטארישע אנטוויקלונג נעמט ארום גרויס התרגשות ביי כלל חסידי צאנז, ווען עס ווערט געמאלדן איבער א ערשטמאליגע שבת וואס כ"ק אדמו"ר מצאנז שליט"א וועט פראווענען מיט נדיבי לב תומכי היכלי התורה והחסידות צאנז.
די היסטארישע נייעס קומט אריבער דרייסיג יאר זינט כ"ק אדמו"ר מצאנז שליט"א איז ארויף אויפן כסא מלוכה, און האט ביז היינט נאך קיינמאל נישט געפראוועט א שבת בלויז מיט גבירים. אצינד צו ארויסהעלפן דעם שווערן עול פון די מוסדות הקדושים דחסידי צאנז, ווען די געטרייע הנהלת המוסדות זוכן פון אלע זייטן פרישע פראיעקטן צו קענען אריינברענגען סכומים אדירים למען החזקת המוסדות, און קענען ווייטער באצאלן די איינגעשטעלטע, און מיטגיין מיטן בליענדן וואוקס בליעה"ר, האט דער רבי שליט"א איינגעשטימט צו אויספירן דעם אנבאט, און פראווענען א ספעציעלע שבת מיט די נגידי החסידות.
די גרויסע שבת מיטן נאמען "עתיקא קדישא", וועט פארקומען בעז"ה קומענדיגן חודש סיון, שבת פרשת שלח הבא עלינו לטובה, ווען דער רבי וועט פראווענען א שבת אין אלטשטאט ירושלים, בעיר עתיקא קדישא, הארט קעגן איבער דעם מקום המקדש, ביים שריד בית מקדשינו דער כותל המערבי.
צום שבת ווערן געלאדנט די חשובע נדיבי לב די נגידים ותומכים, וואס שליסן זיך אן מיט גרויסע סכומים ארויסצוהעלפן די בליה און וואוקס פון די צאנזער מוסדות בארץ הקודש, די גייסטרייכע שעות פון התרוממות הנפש וועט זיך שוין אנהייבן דאנערשטאג פריער מיט א רייע מעמדים אין דעם הייליג ארט, און וועט זיין צוגעשטעלט אויף א גאר רייכע פארנעם ווי עס פאסט פאר די חשובע תומכים.
דעם מיטוואך ב' אייר האט כ"ק אדמו"ר מצאנז שליט"א אפגעשריבן א ספעציעלע מכתב קודש לכבוד די נדיבים בעם חסידים נכבדים, וואו דער רבי ברענגט ארויס די וויכטיגקייט פון שטיצן די מוסדות בכל עת ועידן, און בפרט יעצט ביים מגבית יחידי סגולה ווען מ'וועט בעז"ה פראווענען דעם קומענדיגן שבת פרשת שלח לסדר טובה הארץ מאוד מאוד, ביים מקדש מלך עיר מלוכה מיטן ציהל ארויסצוהעלפן און שטיצן די מוסדות.
