די אידישע וועלט איז איינגעהילט אין טרויער נאך די פטירה פון הרב הגאון ר' שלום בער ליפסקער ז"ל לאנגיעריגער הויפט חב"ד רב אין פלארידע, וועלכער איז באקאנט מיט זיינע פילע אויפטואונגען פאר כלל ישראל דורכאויס די יארן, איבערהויפט מיט זיינע לייסטונגען למען אסירי ישראל אין אמעריקאנער טורמעס.
הגאון ר' שלום בער האט מייסד געווען די וואויל באקאנטע "אלף" אינסיטיטוט, ארויסצוהעלפן אידישע ארעסטאנטן אין אמעריקע, ער אליינס פלעגט ארומפארן און מחזק זיין די אלע אידן, און שטארק מחזק געווען אנדערע אידן צו פארשפרייטן חיזוק און קירוב פאר אידישע ארעסטאנטן.
ר' שלום בער איז געבוירן אין טאשקענט אין אוזבעקיסטאן, נאכן קריג איז ער אנגעקומען קיין קאנאדע צוזאמען מיט זיין משפחה, און שפעטער איז ער אנגעקומען קיין ניו יארק וואו ער איז אריין לערנען אין די ליובאוויטשע ישיבה אין קראון הייטס. אלס אינגערמאן איז ער געפארן קיין פלארידע אויפן שליחות פון כ"ק אדמו"ר מליובאוויטש זצ"ל, צוערשט איז ער געווען דער מנהל פון די אידישע מוסדות אין מיאמי ביעטש, און דורכאויס די יארן האט ער געבויט קהילות און מוסדות התורה און פארוואנדלט געווארן אלס דער הויפט חב"ד רב אין די געגנט, אין לאקאלער רב פון די בעל הארבאר געגנט אין פלארידע.
דעם שבת איז ער פלוצלינג נפטר געווארן אין עלטער פון אכט און זיבעציג יאר, די לוויה איז פארגעקומען ביים בית המדרש אין בעל הארבאר פלארידע, און יעצט נאכמיטאג קומט פאר די לוויה ביים מאנטיפיורי בית החיים אין קווינס.
