א דראמאטישע מעלדונג איז ערשינען היינט דורך די פארוואלטונג פון די מקומות הקדושים אין ארץ ישראל, אז די ציון הק' פון שמואל הנביא וואס איז יאר יערליך א תל תלפיות פאר צענדליגע טויזענטער אידן, איבערהויפט אין טאג פון די יארצייט כ"ח אייר, וועט היי יאר זיין פארשלאסן צוליב מאנגל אין געלט, צוצושטעלן די נויטיגע זיכערהייט פאר די מתפללים.
לויט די באריכטן, זענען פארשידענע אפטיילונגען אינערהאלב די ציוניסטישע רעגירונג זיך נישט דורכגעקומען צו באשטעטיגן א בודזשעט וואס זאל דעקן די קאסטן פון צושטעלן די נויטיגע זיכערהייט ארום דעם ציון הק', צו פארמיידן שטופעניש און פארשידענע פראבלעמען וואס זאל זיך חלילה נישט מאכן.
די אנטוויקלונג ווערט אויפגענומען מיט גרויס שאק דורך שלומי אמוני ישראל, ווען מען הערט די סיבה פארוואס די מקום קדוש וועט זיין פארשלאסן, בלויז ווייל די ציוניסטישע רעגירונג וואס איז נישט משיג די גרויסקייט פון דעם מקום קדוש אין דעם הייליגן טאג, קען זיך נישט דורכקומען אין פאליטישע אנגעלעגנהייטן צו באשטעטיגן די נויטיגע זיכערהייט פאנדן, און דעריבער קלויבן זיי אויס די אפציע פון גענצליך פארשליסן דעם הייליג פלאץ אין אזא גרויסע טאג.
