שווערע נייעס איז געווארן אויפגענומען פון ארץ ישראל, איבער די פריהצייטיגע פטירה פון הגאון הצדיק רבי יחזקאל שרגא דוד האלפערין זצ"ל, רב חסידי צאנז אין רמות געגנט אין ירושלים, א זון פון הגה"צ גאב"ד ראדאמישלא שליט"א פון רמות, און א איידעם ביי כ"ק אדמו"ר מסטראפקוב שליט"א.
דער רב זצ"ל איז געווען פון די גאר חשובע רבנים בחצר הקודש צאנז, לאנגע יארן האט ער מרביץ תורה געווען אין די ישיבות הקדושות דחסידי צאנז און אויפגעשטעלט תלמידים נאמנים. ליידער האט ער זיך געמוטשעט די לעצטערע חדשים מיט די ביטערע מחלה ה"י אויף א גאר שווערע פארנעם, און דעם מוצאי שבת קודש איז ער נפטר געווארן לחיי העולם הבא, אין בליענדן עלטער פון ניין און פופציג יאר, צום טיפן צער און טרויער פון אלע ידידים חסידים און בני המשפחה.
ו' טבת תשכ"ו איז ער געבוירן געווארן, און מען האט אים געגעבן דעם נאמען "יחזקאל שרגא" נאכן בעל ההילולא הרה"ק משינאווא זי"ע בעל דברי יחזקאל, וועמענס יארצייט עס געפאלט ו' טבת, ווען די נאמען "דוד" איז נאך זיין עלטער זיידן דער דאבשיצער רב זצ"ל, פאטער פון הגה"ק רבי אלחנן האלפערין זצ"ל גאב"ד ראדאמישלא אין לאנדאן. מצד אביו האט ער געצויגן א הערליכע יחוס צו גאר חשובע רבנים וצדיקים אין די צאנזער דינאסטיע, און מצד אמו איז ער געווען אן אייניקל פון הגה"צ רבי שמואל אלכסנדר אונסדארפער זצ"ל רב דקהל מתיבתא ראשית חכמה אין מאנטריאל, ורב חסידי צאנז אין פתח תקוה.
אין זיינע יונגע יארן איז ער אויפגעוואקסן אינערהאלב די צאנזער מוסדות אימפעריע, זייענדיג א פלומעניק פון כ"ק אדמו"ר מצאנז שליט"א, און אויפוואקסענדיג אין א שטוב וואו די חשובע זיידעס זענען געווען אדוק ומקושר צו הגה"ק מצאנז קלויזענבורג זי"ע בעל שפע חיים. בהגיעו לפירקו איז ער געווארן אן איידעם ביי כ"ק אדמו"ר מסטראפקוב שליט"א מחשובי האדמורי"ם אין די צאנזער דינאסטיע, און נאך די חתונה האט ער מרביץ תורה געווען פאר תלמידים זייענדיג פון די חשובע אינגעלייט אין די צאנזער קהילה אין ירושלים. מיט עטליכע יאר צוריק איז ער געווארן אויפגענומען אלס רב ואב"ד פון די צאנזער בית המדרש אין רמות, וואו ער האט משפיע געווען פאר די אינגעלייט תורה וחסידות על דרך אבותיו ורבותיו הקדושים.
נאך א גאר שווערע קראנקהייט איז דער רב זצ"ל נפטר געווארן דעם מוצאי שבת קודש, און די מסע הלוויה איז פארגעקומען היינט זונטאג בעיר הקודש ירושלים, אין שפיץ פון די חשובע עלטערן להבחל"ח, זיין פאטער הגה"צ רבי יצחק ארי' לייבוש האלפערין שליט"א גאב"ד ראדאמישלא רמות, און זיין שווער כ"ק אדמו"ר מסטראפקוב שליט"א, ועל צבאם דער גרויסער פעטער כ"ק אדמו"ר מצאנז שליט"א.
