בחצר הקודש בעלזא גרייטן זיך די טויזענטער חסידים צו א היסטארישע חגיגה, ווען עס וועט געפראוועט ווערן די פרייליכע מעמד הכנסת ספר תורה וואס אלפי חסידי בעלזא האבן געשריבן לכבודו ולזכותו פונעם מנהיג העדה כ"ק אדמו"ר מבעלזא שליט"א, און וועט פארקומען דעם קומענדיגן זונטאג ערב יו"ט שבועות.
די פראיעקט צו שרייבן דעם פאראייניגטן ספר תורה האט זיך אנגעהויבן מיט איבער א יאר צוריק, ווען הגה"צ ר' אהרן מרדכי רוקח שליט"א בנו יחידו פון כ"ק אדמו"ר מבעלזא שליט"א האט פראקלאמירט די געדאנק פאר די חסידים, און זינט דאן האבן טויזענטער חסידים פון איבער די גאנצע וועלט זיך אנגעשלאסן מיט א פאראייניגטע כח צו קויפן זכותים און פרשיות אינעם ספר תורה, און דערמיט געבן דעם זכות פארן מנהיג העדה כ"ק אדמו"ר מבעלזא שליט"א למען יאריך ימים על ממלכתו.
מיט עטליכע חדשים צוריק האט כ"ק אדמו"ר מבעלזא שליט"א באשטימט די זמן החגיגה אויף דעם קומענדיגן זונטאג נשא ערב יו"ט שבועות, און אצינד שטייענדיג שוין געציילטע טעג צו דעם גרויסן טאג האלט מען אינמיטן די פיבערהאפטיגע הכנות צו אהערשטעלן דעם גרויסן מעמד ברוחניות ובגשמיות.
די מעמד וועט פארקומען אויפן גיגאנטישן שטח ברחבת ביהמ"ד הגדול אין קרית בעלזא ירושלים, וואו עס ווערט אויפגעשטעלט ריזן הויכשטאקיגע פארענטשעס מיט גענוג פלאץ פאר די טויזענטער חסידים. נעבן די גרויסע שטוב וועט זיין א ריזן בימת הכבוד, און העכער דעם שטעלט מען אויף א פראוועזארישע דאך.
דארט אויפן פלאץ וועט אויך געפראוועט ווערן די טישן דורכאויס יו"ט שבועות, און די פרייליכע טישן, שמחת הפארשפיל, און שמחת השבע ברכות, דורכאויס די ימי השמחה בחצר הקודש בעלזא, וואס קומט פאר שפעטער אין חודש סיון, שמחת החתונה פון די כלה א טאכטער ביי הגה"צ ר' אהרן מרדכי רוקח שליט"א, בנו יחידו פון כ"ק אדמו"ר מבעלזא שליט"א.
