די חשוב'ע פילאנטראפן און פטרוני מוסדות טאהש וועלכע האבן זוכה געווען מיטצוהאלטן דעם דערהויבענעם שבת המייסדים זענען נאך אלס אונטערן רושם פון דעם הערליכן שבת וואס איז פארגעקומען אינעם הילטאן האטעל אין פארסיפעני ניו דשערסי, אויפן רייכע עלעגאנטע פארנעם אזוי ווי עס פאסט זיך פאר די נגידים פטרוני מוסדותינו הקדושים.
דער שבת איז געווען אן אויסטערלישער געלעגנהייט פאר נגידים לבית טאהש ממלא צו זיין רצון קדשו פון כ"ק אדמו"ר הגה"ק מטאהש זי"ע, וועלכע האט כל ימיו געשטרעבט צו עפענען מוסדות הקדושים אין ניו יארק אז זיינע תלמידים וחסידים אין ניו יארק זאלן האבן מוסדות וואו מחנך צו זיין זייערע קינדערלעך אויפן זעלבן הייליגן טאהש'ער דרך וואס ער האט מקבל געווען מאבותיו הקדושים.
ב"ה אין די לעצטע דריי יאר האבן זיך צעבליט פינף הערליכע מוסדות אין ניו יארק, א תלמיד תורה אין מאנסי און אין בארא פארק, א מיידל סקול אין וויליאמסבורג, און א ישיבה קטנה און ישיבה גדולה אין קרית יואל.
אבער עס איז זעלבסטפארשטענדליך אז עס פארלאנגט זיך איבערמענטשליכע כוחות צו עפענען איין מוסד, און ווער רעדט נאך פון פינף הייליגע מוסדות אינעם קורצן צייט-אפשניט פון בלויז דריי יאר, פאר דעם פארלאנגט זיך שוין הימלישע כוחות.
טאקע דערפאר איז פאררופן געווארן דעם שבת קודש, מיטן ציל מייסד צו זיין דעם איגוד מוסדות טאהש ניו יארק, און געבן פאר די פילאנטראפן די מעגליכקייט אוועקצושטעלן א מעכטיגער פינאנציעלער ריקנביין פאר די מוסדות צו קענען אנגיין און נאך ווייטער מרחיב זיין גבולי קדושה.
דער שבת איז געווען אהערגעשטעלט מיט די בעסטע פון ביידע וועלטן, פון איין זייט איז עס געווען אויסגערישט אויף אן אויסטערליש רייכן פארנעם, אבער פון די אנדערע זייט איז עס געווען מלא התעוררות והתרגשות, מיט נאסטאלגישע זכרונות פונעם הייליגן רבי'ן זי"ע.
ביים אנקומען האט אפגעווארט פאר חשוב'ע געסט א רייכע טועמי' אינעם יריד-מארק אויפן אלטן שטייגער, מיט מעדנים ומטעמים הרבה מינים מבעוד יום מוכנים. ווי אויך איז ספעציעל געבויעט געווארן א הייסע באקוועמע מהודר'ידעג מקוה, בהשגחת דייני הקהלה שליט"א.
צוויי שעה פארן זמן האט כ"ק אדמו"ר מטאהש שליט"א אויפגענומען אלע נגידים בהיכל הביהמ"ד לברך ולהתברך, יעדער נגיד האט אונטערגעשריבן דעם ספעציעלן מגילת היסוד, מייסד צו זיין די "איגוד מוסדות טאהש ניו יארק". דערנאך האבן די נגידים מקבל געווען א הערליכע מתנה פון כ"ק אדמו"ר מטאהש שליט"א, די נייע לעדערנע "זמירות עבודת משולם פייש".
דערנאך איז פארגעקומען דער מעמד "אבות על בנים", ווי מ'האט געזינגען ווארימע ניגוני התעוררות, און דער חזן מו"ה ישראל אדלער הי"ו האט אויפגעטרעטן מיט ווארימע חרוזים מעורר צו זיין דעם ציבור שופך שיח צו זיין על בנינו ועל דורותינו. תיכף דערנאך האט דער רבי שליט"א געצינדן די נרות שבת, און ספעציעלע לעכט לע"נ רביה"ק זי"ע, און געזאגט די הייליגע תפילת השל"ה און שיר השירים אינאיינעם מיטן גאנצן ציבור מיט גרויס התעוררות. אזוי איז מען אריינגעגאנגען אינעם שבת אין א העכערן אטמאספערע ממש מעין עוה"ב.
נאכן דאווענען איז דער גאנצער ציבור אינעם אולם השלחנות, וואו עס האט זיי אפגעווארט א מלכות'דיגער סעודת שבת, עס האט ארויסגעשריגן רייכטום פון אלע זייטן, מיט א רייכע אויסוואל פון פילע סארטן נארהאפטיגע מאכלי שבת קודש. דער ציבור האט געזינגען אינאיינעם די זמירות שבת, אנגעפירט דורך 'זמרה קאפעליע'. נאך די סעודה איז געווען צוגעשטעלט א רייכע באטע פארן גאנצן עולם, ווי מען האט פארברענגט אינאיינעם בשירה ובזמרה.
כמעשהו בליל שבת קודש, כן מעשהו ביום השבת, שבת נאכמיטאג איז געווען צוגעשטעלט א רייכע עונג שבת. אזוי איז אדורך דער גאנצער שבת קודש אויף א הערליכן פארנעם די באטייליגטע האבן זיך געשפירט פאר א זכי' צו קענען זיין א חלק פון דעם הייליגן אונטערנעמונג לעשות רצון קדשו פון זייער הייליגן רבי"ן זי"ע.
מוצאי שבת האט די רבי שליט"א געמאכט הבדלה, נאך הבדלה האט דער וועלט בארימטער חזן ובדחנא דמלכא מוה"ר ישראל אדלער הי"ו אויפגעטרעטן מיט רירנדע חרוזים, און הערליך שיין צאמגענומען וויאזוי עס איז פארריבער די גאנצע שבת מתחילתו ועד סופו, די רייכע דרשות פרייטיג צונאכטס, שבת צופרי און פרקי אבות, און די שלש סעודות תורה פון מרן רבינו שליט"א, און וויאזוי מיטצונעמען די השפעות פונעם שבת אויף ווייטער, באגלייט מיט א געלט מעשה פון רבינו הקדוש זי"ע.
דערנאך זענען אלע חשוב'ע נגידים אריבער ביים רבי'ן פאר א לענגערע צייט, ווי דער רבי האט אריינגעשריבן ביי יעדעם עקסטער חתימת יד קדשו אין די נייע לעדערנע זמירות עבודת משולם פייש, וועלכע די חשוב'ע נגידים האבן באקומען במתנה מידי קדשו פון רבינו שליט"א ערב שבת קודש.
דער שבת איז געקרוינט געווארן מיט אן אומגלויבליכן סוקסעס, די נגידים זענען אריינגעקומען מיט פאנטאסטישע סכומים און האבן אויסגעקויפט זכותים אין די מוסדות הקדושים נאך פיל מער ווי געראכטן, אויף אזוי ווייט אז תיכף נאך שבת קודש, איז שוין פארגעקומען אסיפות צו עפענען א נייע מיידל שולע אין מאנסי אויך, אלעס אדאנק די נדיבות הלב פון די חשוב'ע פילאנטראפן לבית טאהש.
אין די יעצטיגע טעג ווערט אויך געפלאנט א באזונדערע רייכע באנקעט פאר די אלע נגידים וועלכע האבן זיך נישט געקענט באטייליגן אויפן שבת קודש, אבער ווילן פארט האבן א חלק אינעם התייסדות פון איגוד מוסדות טאהש ניו יארק, און אזוי העלפן ממלא זיין רצון קדשו פונעם הייליגן טאהש'ער רבי"ן זי"ע.
בלייבט נאר צו וואונטשן אז די אלע נגידים זאלן טאקע זוכה זיין אז לא ימוש התורה מפיהם ומפי זרעם מעתה ועד עולם, וזכותו הגדול פון כ"ק אדמו"ר הקוה"ט מטאהש זי"ע זאל זיי טאקע באגלייטן לעד ולעולמי עולמים, אמן.
