די פארוואלטונג פון אגודת ישראל האט היינט ארויסגעשטעלט אן אפיציעלע מעלדונג איבער די קומענדיגע סיום הש"ס וואס וועט בעז"ה געפראוועט ווערן במקהלות אלופי אלפי ישראל, ווען הונדערטער טויזענטער אידן וועלן ווידער מסיים זיין גאנץ ש"ס אין ראם פון די וועלטליכע סדר הלימוד "דף היומי" וואס ציהט שוין היסטאריע העכער הונדערט יאר.
אין גענוי צוויי יאר פון היינט, ראש חודש סיון שנת תשפ"ז, וועט פארקומען די היסטארישע סיום הש"ס מחזור י"ד, און צום דריטן מאל אין א רייע וועט עס געפראוועט ווערן אין די גיגאנטישע מעטלייף סטאדיום אין ניו דזשערזי, וואס איז געווען די אכסניא של תורה ביים ריזיגן סיום הש"ס אין חודש אב תשע"ב, און ביים לעצטן סיום הש"ס אין חודש שבט תש"פ.
אין א מעלדונג אז מען שטייט אצינד זיבן הונדערט ניין און דרייסיג בלאט גמרא בעפאר די סיום הש"ס, ווערט געמאלדן די באשטעטיגונג איבער די גרויסע מעמד ווען כלל ישראל וועט ווידער טאנצן אינאיינעם, אינעם גרויסן טאג פון ראש חודש סיון, ביום הזה באו מדבר סיני אויף קבלת התורה, זונטאג פרשת נשא תשפ"ז הבא עלינו לטובה.
