חסידי סקולען האבן דעם דינסטאג מיטגעהאלטן א ספעציעלע כינוס מיטן נאמען "להמשיך", געצילט אוועקצושטעלן א פעסטע יסוד און עתיד פאר די קהילה קדושה "ישועת ישראל סקולען" המתנוסס לתפארה בעיר התורה וחסידות בארא פארק, בית מדרשם פון די הייליגע צדיקים לבית סקולען נשמתם בגנזי מרומים, וואס ווערט ווייטער נמשך ביז היינט דורך כ"ק אדמו"ר מסקולען שליט"א.
די סקולענער בית המדרש אויף די פיר און פופציגסטע סטריט ביי די דרייצנטע עוועניו, איז א ריכטיגע תל תלפיות פאר שווערע טויזענטער אידן, שוין באלד צו א יובל יארן נאכאנאנד. אין די לעצטע תקופה איז אנטשטאנען א רייע פינאנציעלע שוועריגקייטן אויפצוהאלטן דעם בית הגדול והקדוש, און צום האפענונג צו קענען צוריקשטעלן על מכונו, להמשיך מורשת צדיק אין דעם מקום קדוש, האט מען אונטערגענומען דעם יעצטיגן קאמפיין "להמשיך".
די מעמד איז פארגעקומען דינסטאג נאכט ליל ראש חודש סיון אינעם היכל בית המדרש, אין שפיץ פון כ"ק אדמו"ר מסקולען שליט"א וועלכער האט משמיע געווען דברות קודש און די משא המעמד. אלס נואם הכבוד האט אויפגעטרעטן דער באגאבטער רעדנער פה מפיק מרגליות הרב אהרן ארי' אייזענבערג שליט"א, און אויפן בימת הכבוד האבן באשיינט צווישן אנדערע דער איינציגער ברודער פונעם רבי'ן כ"ק אדמו"ר מישועת יעקב סקולען שליט"א, און דעם רבינ'ס פעטער כ"ק אדמו"ר מסטרעליסק שליט"א.
