היינט פארטאגס איז כ"ק אדמו"ר מגור שליט"א אנגעקומען אויף א היסטארישע מסע הקודש קיין אמעריקע, א געהויבענע נסיעה וואס דער רבי שליט"א האט אונטערגענומען מיטן איינציגן ציהל אוועקצושטעלן א פעסטע יסוד פאר די מוסדות הקדושים, אין ליכט פון די שווערע פינאנציעלע צושטאנד וואס האט זיך געשאפן אין רעזולטאט פון די רדיפת הדת בארץ הקודש.
דער רבי שליט"א איז ארויסגעפארן מוצאי שבת קודש מיט א פריוואטע פליגער, צוגעשטעלט דורך הנדיב הנכבד ר' יואל לאנדא הי"ו פון וויליאמסבורג, איידער'ן ארויספארן איז אנגעקומען זיך געזעגענען מיטן רבי'ן האדמו"ר רבי פנחס אבוחצירא שליט"א וועלכער האט זיך געזעגענט מיטן רבי'ן אין א פריוואטע צימער אין לופטפעלד, און היינט פארטאגס האט דער רבי געלאנדעט בשלום אין די טיטערבארא לופטפעלד אין ניו דזשערזי.
פון לופטפעלד איז דער רבי אריינגעפארן קיין בארא פארק, וואו דער רבי האלט זיך אויף בבית האכסניא אין שטוב פון הנגיד החסיד ר' יעקב קליין הי"ו. היינט דורכ'ן טאג וועט דער רבי באזוכן אין שטוב פון הנגיד החסיד ר' בנימין בייטעל הי"ו, און שפעטער ביינאכט וועט פארקומען א פראכטפולע מסיבה אין שטוב פון הנגיד החסיד ר' שלמה ווערדיגער הי"ו בריח התיכון פון איחוד מוסדות גור.
דורכאויס די וואך וועט דער רבי באזוכן בבתי נגידים ושועים וואס לאזן זיך קאסטן מיליאנען לטובת דעם קרן הצלת עולם התורה, מיטן ציהל צו פארזיכערן א פינאנציעלע יסוד פאר די קומענדיגע צוויי יאר פאר די מוסדות הקדושים די ישיבות און די כוללים דחסידי גור.
אזוי אויך וועט פארקומען אין שפיץ פונעם רבי'ן די מעמד חנוכת הבית פאר די נייע בנין החדש תלמוד תורה אמרי אמת דחסידי גור, וואס איז הערליך פארענדיגט געווארן כלול בהדרו אין די לעצטערע חדשים.
