אלפי חסידי סאטמאר די בכל אתר ואתר, און בפרט די הונדערטער חסידים תושבי ארצינו הקדושה, נעמען אויף אצינד די פרייליכע מעלדונג אז עס איז באשטעטיגט געווארן די פלענער איבער די גרויסע מסע הקודש וואס כ"ק אדמו"ר מסאטמאר שליט"א גרייט זיך אונטערצונעמען קיין ארץ ישראל אין די קומענדיגע ווינטער חדשים, מיטן ציהל צו משפיע זיין פונדערנאנט אויף קהל עדת צאן מרעיתו, און באשיינען א רייע מעמדים פון הרחבת גבולי הקדושה בקרב קהילות ומוסדות סאטמאר בארץ הקודש.
די רעדע איז פון צוויי הערליך פראכטפולע בניני המוסדות, איינס אין בני ברק, און איינס אין ירושלים, וואס איז אין די לעצטע פאר יאר געווארן אויפגעבויעט בתכלית היופי, מיטן הילף פון תלמידי וחסידי סאטמאר פון איבער די וועלט, און אצינד ווען מען גרייכט די פריידיגע מאמענט פון חנוכת הבית וועט דער רבי שליט"א מופיע זיין בשערי ארץ הקודש און פערזענליך באשיינען די גרויסע שמחה.
די נסיעה וועט פארקומען אין די וואך פון פרשת תולדות, עס וועט זיך אנהייבן ענדע חודש חשון און זיך אריינציען אין חודש כסלו, און צום הויכפונקט וועט בעז"ה געפראוועט ווערן א היסטארישע שבת אין אתרא קדישא מירון, שטייענדיג גאנצע צעהן יאר זינט דער רבי שליט"א האט דאס לעצטע מאל געפראוועט א גרויסע שבת אין אתרא קדישא מירון מיט טויזענטער חסידים, אין חודש אדר תשע"ו.
