היינט דינסטאג ווערט געמאלדן אז די היסטארישע מסע הקודש פון כ"ק אדמו"ר מגור שליט"א לטובת די קרן הצלת עולם התורה דחסידי גור, וועט זיך פארציען מיט נאך עטליכע טעג לענגער ווי געפלאנט, ווען דער רבי שליט"א וועט פארבלייבן איבער שבת אין ניו יארק, און פראווענען א זעלטן געהויבענע שבת מיט נדיבי לב אינעם עיר התורה והחסידות מאנסי.
די פארלענגערונג פון די נסיעה קומט נאכדעם וואס נאך און נאך נדיבים בעם האבן זיך אנגערופן ווארעם צו זיין א טייל פון דעם היסטארישן רעוואלוציע, און מתרים זיין פאנטאסטישע סומעס פארן רבי'נס קאסע, צו האבן די זכיה ליהנות מזיו אורו, וויילן ביים רבי'ן בצל הקודש און האבן די זכיה אריינצונעמען דעם רבי'ן ביי זיך אין שטוב.
דעם קומענדיגן שבת קודש פרשת בהעלותך וועט דער רבי זיין צוגאסט אין שטאט מאנסי, אין שטוב פונעם לעגענדארן עסקן און נגיד מפורסם בחצר הקודש גור, הנגיד החסיד ר' מאיר פריי הי"ו. דערביי וועלן האבן די זכיה די גרעסערע עשירים צו מיטהאלטן דעם שבת, אלע וואס שליסן זיך אן מיטן סכום אדיר פון א פערטל מיליאן דאללער, און וועלן האבן די זכיה להסב על שולחן מלכים.
צו דעם שבת קומען אויך צו פארן פילע נדיבי לב פון אנדערע שטעט און לענדער, אריינגערעכנט אייראפע און ארץ ישראל, גערער גבירים וואס ווילן נישט פארפאסן אזא זעלטענע שבת ווען מ'וועט זוכה זיין צו פארברענגען אינאיינעם מיטן רבי'ן אויף א פריוואטע פארנעם כשהמלך בשדה.
