היינט דאנערשטאג לסדר ונועדו אליך הנשיאים ראשי אלפי ישראל, איז פארגעקומען א היסטארישע און געמיינזאמע אסיפה דורך די גדולי הדור ומורי הוראה אין אמעריקע, ווען ארום דעם טיש זענען געזעסן חשובע רבנים און דיינים וואס האבן דורכגעטון דעם דעת תורה הברורה, במעון תורתו פונעם עמוד ההוראה הגה"צ רבי בנימין זאב לאנדא שליט"א דומ"ץ טאהש בארא פארק, וועלכער טראגט שוין דעם שרביט ההוראה א יובל יארן, און במיוחד איז הלכה כמותו אין די גאר קאמפליצירטע שאלות בעניני רפואה וואס מאכט זיך מדי יום ביומו ביים יהדות החרדית, וכל דבר הקשה יביאון אליו.
דער טאהשער דיין האט פערזענליך פאררופן די אסיפה, נאכדעם וואס א פארצווייגטער שאלה איז עולה על שלחן מלכים די לעצטע תקופה, און איז נוגע די צובראכענע פארפעלקער פון אידישע קינדער חשוכי בנים המצפים לישועה. זייענדיג דער אפיציעלער אדרעס פאר אט די שאלות און ספיקות האט דער גאון שליט"א געשפירט פאר וויכטיג אראפצושטעלן דעם קלארן דעת תורה הצרופה, אינאיינעם מיט די גדולי הוראה פון די גרעסטע קהלות קדושות בישראל, וואס זענען די עמודי ההוראה בדורינו להשיב בדבר ה' זו הלכה בכל מקומות מושבותיהם.
ביים אסיפה זענען געווען אנוועזנד: דער בעל אכסניא הגה"צ דומ"ץ טאהש ב"פ; הגה"צ אבד”ק סאטמאר וויליאמסבורג שליט"א בשליחות אביו כ"ק אדמו"ר מסאטמאר שליט"א; הגאוה"צ אבד"ק פאיע, אבד"ק מכלל יופי, און הגה"צ ר' לייבוש פריעדמאן, חברי ביד"צ דקהל יטב לב סאטמאר שליט"א בשליחות רבם כ"ק אדמו"ר מסאטמאר שליט"א; הגה"צ רבי יוסף ישראל אייזענבערגער שליט"א דומ”ץ שיכון סקווירא; הגה"צ רבי מאיר גרינוואלד שליט"א דומ"ץ פאפא, און הגה"צ רבי לוי יצחק גרינוואלד שליט"א, דומ"ץ פאפא ב"פ, בשליחות אביהם כ"ק אדמו"ר מפאפא שליט"א;הגה"צ אבד"ק באבוב 45 שליט"א, הגה"צ גאב"ד טענקא שליט"א; הרה"ג ר' חיים יחזקאל בערקאוויטש שליט"א, בשליחות אביו הגאון הגדול דומ"ץ קרית יואל שליט"א בעל אגלי דבש; הרה"ג ר' אברהם חיים שטיינווארצל שליט"א, אבד"ק מטה אפרים ור"י שערי יושר; הרה"ג ר' אפרים שמעון לייכטאג שליט"א דומץ סאטמאר 15; הרה"ג ר' אלעזר ניסן שטראלי שליט"א, דומ”ץ סאטמאר דבר"י ב"פ; הרה"ג ר' ארי' ראזענפעלד שליט"א דומ”ץ סאטמאר קרית יואל; הרה"ג ר' אברהם מאיר האלבערשטאם שליט"א דומ”ץ סאטמאר 18; הרה"ג ר' בנימין זאב פליישער שליט"א, דומ"ץ וויזניץ ב"פ; הרה"ג ר' בערל איינהארן שליט"א דומ”ץ סקווירא 12; הרה"ג ר' דוד לייב פישער שליט"א, דומ"ץ פאפא; הרה"ג ר' חיים אהרן אונגאר שליט"א, דומ”ץ סאטמאר סאוט אכט; הרה"ג ר' יחיאל יעקב מיללער שליט"א, אבד”ק אייזנשטאט; הרה"ג ר' יצחק ביסטריצקי שליט"א, מרבני ק"ק באיאן; הרה"ג ר' יצחק הערשקאוויטש שליט"א, אב"ד האליין ודומ"ץ צאנז קלויזענבורג; הרה"ג ר' ישראל ראזענבערג שליט"א, דומ”ץ וויזניץ וויליאמסבורג; הרה"ג ר' יעקב ברוך לעדערייך שליט"א, אבד"ק סטאלין ב”פ; הרה"ג ר' יצחק זלמן גיפס שליט"א אבד"ק ברכת אברהם וראה"כ ספינקא ב”פ; הרה"ג ר' משה פאגעל שליט"א, אבד”ק פני מנחם; הרה"ג ר' מאיר יוסף רובין שליט"א, דומ”ץ ראחמיסטריווקא; הרה"ג ר' פנחס כ”ץ שליט"א דומ"ץ סאטמאר גערי; הרה"ג ר' צבי היילפרין שליט"א דומ"ץ וויען ב”פ; הרה"ג ר' שמעון כ”ץ שליט"א, דומ”ץ סאטמאר מאנסי; הרה"ג ר' שלום פסח לאנגזאם שליט"א, דומ”ץ בעלזא ב”פ; הרה"ג ר' שלמה שבתי קעסטענבוים שליט"א דומ"ץ סאטמאר בנין בראך.
דער געהויבענער אסיפה איז געעפענט געווארן מיט דברי פתיחה פון הרב הגאון רבי יצחק ביסטריצקי שליט"א, מרבני ק"ק באיאן ב"פ, וואס האט ארויסגעברענגט די געהויבענע זכי' צו זיצן אין דעם בית וועד לחכמים פון אחד המיוחד מגדולי ההוראה, וואס פריערדיגע גדולי ישראל האבן אים געגעבן סמכות אויף האקעלע ענינים און אים פארבארגט צוטרוי אין יענע יארן איבער אסאך קאמפליצירטע שווערע שאלות און ספיקות בדברים העומדים על הפרק, און האבן זיך אויסגעדרוקט זעלטענע לשונות איבער דעם תורה ריז, ובפרט איז באקאנט דאס לשון וואס איז געווען מורגל בפיהם פון די גדולי קמאי "רבי בנימין איז אראפגעקומען אויף די וועלט צו העלפן אידישע קינדער", איז זיכער אז ביי אט דעם כנסי' לשם שמים ווען מען קומט זיך צוזאם מברר צו זיין כשמלה דעם ריינעם דעת תורה וועט זיכער ארויסקומען א תועלת פאר די קומענדיגע דורות.
דער בעל אכסניא של תורה, הגה"צ דומ"ץ טאהש שליט"א האט אנגעהויבן זיינע ווערטער און קלארגעשטעלט אז מען איז נישט געקומען הערן זיין אייגענע דעת תורה, מ'איז געקומען איבערשמועסן די דעת תורה הבהירה וואס מיר האבן מקבל געווען פון אונזערע גדולים מדור הקודם, די גדולי ועמודי ההוראה והלכה, וועלכע האבן בכח תורתם וצדקתם אוועקגעשטעלט ע"פ דעת תורתינו הקדושה, דער גאון שליט"א האט דערביי אויסגעשמועסט מיט א זעלטענע קלארקייט און בהירות דער מציאות הדברים אין מברר געווען די יסודי הלכה בכל פרטיה געבויט אויף סוגיית הש"ס וגדולי הפוסקים לדורותיהם, און בתוך הדברים האט ער דערמאנט הוראות פון די גדולי הפוסקים בדור העבר בענינים אלו, מרן פוסק הדור הגה"ק בעל שבט הלוי זצ"ל ואתו עמו הגאון הגדול מרן הרב אלישיב זצ"ל.
צווישן זיינע ווערטער האט דער דיין שליט"א דערמאנט די נעמען פון עטליכע גדולי הרבנים שליט"א, וואס האבן שוין גע'פסק'נט זייער דעת תורה, אזוי אויך האט ער געזאגט פאר די פארזאמלטע רבנים שליט"א אז בשליחותו זענען געווען עטליכע מורי הוראה ביי די גדולי הרבנים והפוסקים שליט"א אין ארה"ק וואס האבן גע'חתמ'ט להיתר. דער דיין שליט"א אינאיינעם מיט די פארזאמלטע רבנים און דיינים שליט"א האבן גע'חזר'ט און נאכגעברענגט מפי ספרים וסופרים, די צדדי השאלה מיט אלע נושאי כלים און פרטים, ווען א דראמאטישע ערנסטקייט הערשט ביי די העכער 30 משיבים בדבר ה' זו הלכה וואס האבן אינאיינעם קלארגעשטעלט אז דאס איז די דעת תורה הברורה.
דערנאך האט דער יו"ר הגאון רבי יצחק ביסטריצקי שליט"א אויסגערופען אז כ"ק אדמו"ר מסאטמאר שליט"א, וועלכער ליגט שוין כמה חדשים בעובי הקורה להעמיד הדבר על בוריה, און איז שוין אליינס געזעצן מיט הגה"צ דער טאהש'ער דיין שליט"א און דן געווען לאנגע שעות אין די סוגיא אריכות וקצרות, האט פערזענליך פארבעטן הגה"צ רבי ארי' ראזענפעלד שליט"א דומ"ץ סאטמאר קרית יואל, וואס איז בקי בש"ס ופוסקים באופן מבהיל, אז ער זאל מברר זיין די גאנצע נושא ברור כשמלה עד להלכה למעשה, און דער דיין שליט"א האט בפקודת הקודש דאס מברר געווען ליבון אחר ליבון, אין איז צירוקגעקומען צום רבין מיט זיין דעת תורה להיתר, דער סאטמאר קרית יואל'ער דיין שליט"א האט בתוך רבים צוגעשטימט צו זיינע ווערטער פארנט פון די פארזאמלטע רבנים שליט"א.
דערנאך האט אויפגעטרעטן הרה"ג רבי חיים אהרן אונגאר שליט"א, דומ"ץ בית מדרש לב אהרן דסאטמאר, און בקי נפלא בעניני רפואה, וועלכער איז א תלמיד מובהק פון הגה"צ דומ"ץ טאהש שליט"א, וועלכער האט אראפגעלייגט פאר די פארזאמלטע רבנים שליט"א די השתלשלות הדברים זייט די שאלה איז ארויפגעקומען על שלחן מלכים, און ער האט געזאגט אז דער טאהש'ער דיין האט ארויפגעלייגט אויף אים די משימה אז ער זאל איבערשמועסן די דעת תורה מיט די גדולי ישראל החיים אתנו לשלום, ארויסצוהעלפן די חשוב'ע משפחות המצפים לישועה, זיי אויפצורעכטן מיט די נויטיגע הילף. ער האט בתוך דבריו געזאגט אז דער טאהש'ער דיין שליט"א וואס איז פארנומען יומם ולילה מיט אלע סארטן שאלות און ספיקות וואס איז עולה על שלחן מלכים האט זיך אריינגעלייגט זיך מברר זיין אין די נושא בבירור אחר בירור כמה שנים.
אין אן איבערראשענדער מאמענט אינמיטן די דרשה פון הגאון ר' חיים אהרן שליט"א, האט דער סאטמאר וויליאמסבורגער רב שליט"א געזאגט אז זיין פאטער כ"ק אדמו"ר מסאטמאר שליט"א האט יעצט גערופן אויפן טעלעפאון און ער וויל זאגן עטליכע ווערטער פאר די רבנים שליט"א. די רבנים שליט"א האבן זיך אינאיינעם צוגעהערט צו די פייערדיגע דברות קודש פון כ"ק אדמו"ר מסאטמאר שליט"א, וואס האט אנגעהויבן זיינע ווערטער אז ער האט אליין געוואלט אנטייל נעמען ביי די אסיפה, אבער צוליב די חתונה פון אן אייניקל היינט נאכט אין קרית יואל איז ער נישט געווען ביכולת. דער רבי שליט"א האט אין זיינע ווערטער ארויסגעברענגט אז ער האט דאס אליין מברר געווען בירור אחר בירור, און ס'איז ברור כשמש אז דאס מותר בהיתר גמור, און אזוי האבן אלע גדולי ישראל געטוהן אין אלע דורות, זיך מייגע געווען און אויפגעווען נעכט צו טרעפן א היתר פאר זאכן וואס זענען נוגע צו פארגרינגערן פאר אידישע קינדער. דערביי האט דער רבי אויסגעפירט אז מ'מוז זען ארויסצוהעלפן מיט אלע מעגליכקייטן די פילע משפחות וואס קוקן ארויס געהאלפן צו ווערן בזש"ק, זאגנדיג: ב"ה איך האב שוין געהערט פון מענטשן די לעצטע צייטן וואס דארפן אנקומען צו דעם באנוצן זיך שוין מיט'ן היתר, און דער אייבערשטער זאל העלפן אז זיי זאלן טאקע געהאלפן ווערן מיט קינדער, דער אייבערשטער זאל העלפן אז אלע אידן זאלן געהאלפן ווערן מיט קינדער, און עס זאל זיין בדרך הטבע אן דארפן צוקומען צום היתר, אבער די וואס דארפן צוקומען דערצו זאלן זיך באנוצן מיטן היתר אן א שום הארץ קלאפעניש, זיי זאלן וויסן אז עס איז היתר גמור!!!
הגאון רבי חיים יחזקאל בערקאוויטש שליט"א, מו"ץ בקיט"ל קרית יואל, האט דערציילט פאר די אנוועזנדע רבנים אז זיין פאטער, מגדולי זקני הפוסקים, הגאון הגדול דומ"ץ קרית יואל שליט"א, איז שוין געווען גרייט צו קומען צו די אסיפה רבתי, אבער ס'איז אים באפאלן א חולשה, דעריבער האט ער פארגעליינט א מכתב פון אביו הגדול שליט"א: אל מעלת כבוד הרבנים הגאונים הצדיקים שליט"א יושבים על מדין, כ"א בשמו הטוב יבורך משמי מרום, עדי נזכה לבנין בית ה' בראש הרים. נדרשתי לאשר שאלוני בדבר השאלה העומד על הפרק בענין וכו', לעזור לאלו המצפים בכליון עינים להיפקד בזש"ק. הנה ידידי ומחו' מרן כ"ק אדמו"ר שליט"א כבר כתב בנידון זה בירור הלכה ארוכה וברורה בכחא דהתירא, ואחר העיון נצטרפתי לדבריו, ויה"ר שחפץ ה' בידם יצליח להיפקד בדבר ישועה ורחמים, ויזכו לראות בנים ובני בנים עוסקים בתורה ובמצות על ישראל שלום. כו"ח י"ג לחודש אייר כ"ח למבנ"י שנת תשפ"ה לפ"ק.
מיט די החלטת אסיפה, לפני מלכים מאן מלכי רבנן, האט אויפגעטרעטן הגה"צ רבי יוסף ישראל אייזענבערגער שליט"א, דומ"ץ שיכון סקווירא ורב מפעל הכביר "המדריך להוראה", איבער דעם קלארע פסק הלכה פון די גדולי ישראל בכח דהיתרא בלי שום גרעון, דער דיין שליט"א האט מיט רירנדע ווערטער געזאגט אז מען דארף זיך באגיין מיט די שאלה פונקט אזוי ווי אונזערע גדולים האבן עוסק געווען מיט אן היתר עגונה, אפירצוזוכן א צד היתר מיטן כח התורה. ער האט דערביי אונטערגעשטראכן דאס הארבקייט פון מערער זיין אויף א פסק הלכה וואס גדולים מדור הקודם האבן שוין מתיר געווען און די חוצפה פון זאגן אז זיי האבן זיך טועה געווען, ער האט געזאגט אז דאס באלאנגט אויסדרוקליך פאר די גדולי מורי הוראה, און זיכער נישט פארן המון עם. דער סקווירער דיין שליט"א האט אויסגעפירט און געשלאסן די אסיפה אז בסייעתא דשמיא ובכח דעת תורה וועט דאס ברענגן א ישועה רווחה פאר אזויפיל אידן המצפים לישועה.
ביים שליסונג פון די אסיפת קודש, איז געווען א מחזה הוד צו זען ווי די רבנים שליט"א זענען פארבליבן איבערשמועסן די צדדי השאלה, און אינאיינעם נאכאמאל מברר געווען לאמיתה של תורה, געבויט אויף וואס מיר האבן מקבל געווען פון די גדולי קמאי מדור הקודם, די רבנים שליט"א האבן זיך שווער געשיידט פון די הייליגע מאמענטן, ווען מ'האט אינאיינעם זוכה געווען לברר וללבן דבר ה' זו הלכה.
