תלמידי וחסידי טאהש גרייטן זיך מיטצוהאלטן א זעלטן געהויבענע נסיעה וואס כ"ק אדמו"ר מטאהש שליט"א נעמט אונטער צו די קברי אבות, לקראת די יומא דהילולא קדישא פון זקינו הרה"ק רבי משולם פייש השרף מטאהש זי"ע, וואס געפאלט כ"ח סיון קומענדיגן דינסטאג פרשת קרח הבעל"ט.
דער רבי שליט"א נעמט אונטער די נסיעה אין באגלייטונג פון פילע חסידים, וואס וועלן אויסנוצן די געלעגנהייט מיטצופארן אויף די געהויבענע נסיעה און מעתיר זיין לישועת הכלל והפרט אינאיינעם מיטן מנהיג העדה. די נסיעה וועט זיין געווידמעט בלויז פאר צוויי טעג, ווען מען וועט פוקד זיין דעם ציון הק' בעצם יומא דהילולא קדישא, און דארט אויפן פלאץ וועט דער רבי פראווענען א גרויסע יארצייט טיש במעמד קהל רב, סמוך ונראה צום ציון הק', אינעם הייליגן חצר הקודש טאהש וואס פארפיגט אויף א גרויסע הכנסת אורחים נישט ווייט פונעם ציון הק'.
אין די יעצטיגע טעג טוען די עסקנים ארבעטן פיבערהאפטיג אויסצוארבעטן אלע דעטאלן, סיי איבער די עצם נסיעה דאס פארן און קומען, און סיי די פילע באדערפענישן אהערצושטעלן אלעס דארט אין שטאט טאהש אויפן שענסטן און בעסטן.
