בחצר הקודש פשעווארסק איז היינט געלאזט געווארן אין גאנג א פרישע רענאוואציע פראיעקט, מיטן ציהל צוצוברענגען נאך צענדליגע זיץ פלעצער אינעם היכל בית המדרש.
טראץ וואס די געדרענג איז גאר גרויס, און די נויט צו פארברייטערן בית מדרשו של רבי פון כ"ק אדמו"ר מפשעווארסק שליט"א שרייט זיך ארויס פון אלע זייטן, האט דער רבי שליט"א נישט מסכים געווען אז מען זאל בויען א שפאגל נייע בית המדרש, נאר ענדערש פארברייטערן דעם יעצטיגן בנין בית המדרש לויט די מעגליכקייטן.
די יעצטיגע רענאוואציע פראיעקט ווערט אדורכגעפירט אויף די דרום זייט פון ביהמ"ד, און די חלק הבנין וואו עס איז ביז יעצט געווען די בתי כבוד פון ביהמ"ד, די ביז יעצטיגע הויפט אריינגאנג, און די דאווענען שטיבל זכרון יעקב, ווערט אריינגענומען אלס פרישע חלק אינעם היכל בית המדרש, מיטן צוברענגען נאך קרוב צו הונדערט זיץ פלעצער פאר די מתפללי ביהמ"ד און חסידים.
א נייע הויפט אריינגאנג ווערט אויפגעבויעט אויפן פלאץ וואס איז ביז יעצט געווען ליידיג, און די האפענונג איז אז שוין אויף יום טוב שבועות וועט די ארבעט זיין פערטיג, לנצח על מלאכת בית השם.
