מיט גרויס צער ווערט אצינד אויפגענומען די שווערע בשורה איבער די פריהצייטיגע פטירה פון הרבנית הצדיקת מקאזניץ ע"ה, אשת חבר הגה"צ ר' ישכר רובין שליט"א אבד"ק קאזניץ, און טאכטער פון כ"ק אדמו"ר הרה"ק מקאסוב זצ"ל פון וועמענס הסתלקות מען שטייט נאך אצינד אין די שנת האבילות.
די חשובע נפטרת הרבנית מרים חוה רובין ע"ה, איז אויפגעוואקסן אין שויס פון איר גרויסן פאטער דער קאסובער רבי זצ"ל, מיטגעלעבט די עבודת הקודש אלע יארן און געשטאנען צו הילף מיט אלע מעגליכקייטן, בהגיעה לפירקה האט זי חתונה געהאט מיט איר חשובער מאן שליט"א, וועלכער איז ממשיך דרך אביו הגדול כ"ק אדמו"ר מקאזניץ סיגעיט זצ"ל, און א אייניקל פון להבחל"ח כ"ק אדמו"ר מנאראל שליט"א.
ליידער איז זי נישט געזונט געווען פאר לאנגע יארן, אין די צייט וואס פילע אידן האבן מתפלל געווען לרפואתה און פרובירט צו פארגרינגערן מיט וואס מעגליך. נאך א שווערע פארערגערונג אין די לעצטע צוויי וואכן, איז זי יעצט מוצאי יום טוב כחצות הלילה נפטר געווארן לחיי העולם הבא, אין די יונגע פערציגער יארן, איבערלאזנדיג א שטוב מיט קינדערלעך אינדערהיים יתומים און יתומות.
די רעבעצין ע"ה לאזט איבער איר חשובער מאן דער קאזניצער רב שליט"א, איר דור ישרים יבורך, דארונטער איין קינד וואס האט שוין חתונה געהאט דעם אנהייב יאר, איר חשובע מאמע הרבנית הצדיקת מקאסוב תליט"א, מחברתו הטהורה פון הרה"ק מקאסוב זצ"ל, די באבע הרבנית הצדיקת תליט"א אשת חבר כ"ק גאב"ד זכרון מאיר זצ"ל בעל מחשבת הלוי, און אירע ברידער האדמורי"ם מקאסוב שליט"א און די אנדערע געשוויסטער.
די לוויה וועט פארקומען מארגן מיטוואך אסרו חג 11:00 פארמיטאג, ביים קאסובער בית המדרש אויף די פינף און פופציגסטע סטריט אין בארא פארק.
שנשמע ונתבשר בשורות טובות.
