פרייליכע נייעס נעמט איבער דעם אויבן אן ביי כלל חסידי סקווירא, ווען עס ווערט באקאנט אז א מאסיווע פראיעקט פון הרחבת גבולי הקדושה איז געלאזט געווארן אין גאנג, אפצוקויפן א שפאגל נייע "קרית הישיבות" אויסערן שטעטל, וואו עס וועט ווערן פלאצירט די צוויי ישיבות וואס געפונען זיך אינדרויסן פון שטעטל, און פארמאגן נישט דערווייל א אייגענע קביעות'דיגע אכסניא.
ווי באקאנט איז די ישיבה הקדושה ד'שיכון סקווירא איינגעטיילט אין עטליכע באזונדערע סניפים, אין די צייט וואס די צוויי סניפי הישיבה גדולה "ברכת יעקב" און "ברכת יוסף" געפונען זיך איינקוואטירט אין שיכון סקווירא, איז די דריטע סניף ישיבה גדולה "קול יעקב" סטאנציאנירט אויסערן שטעטל מיט א דארמיטארי, און איז איינקוואטירט אצינד אין די נייטרא שטעטל אין מאונט קיסקא.
דאס זעלבע איז מיט די מתיבתא פאר די עלטערע בחורים, ווען איין סניף פון די מתיבתא איז איינקוואטירט אין שטעטל, און די אנדערע סניף "מאור יעקב" איז איינקוואטירט אין א געדונגענע לאקאל אויסערן שטעטל.
אין די לעצטערע חדשים האט כ"ק אדמו"ר מסקווירא שליט"א אויפגענומען עטליכע טעטיגע עסקנים זאלן אפירזוכן א פאסיג ארט וואו צו קענען איינקוואטירן די ישיבה אין א אייגן פלאץ, און בחסדי ה' האט מען געטראפן א גיגאנטישע שטח אין די ניו ווינדסאר געגנט אין אפסטעיט ניו יארק, וואס געפונט זיך נישט ווייט פון די סטוארד עירפארט, און שטייט צום פארקויפן פארן שטוינענדן פרייז פון דרייצן מיליאן דאללער.
אויפן נייעם שטח וואס האט ביז היינט געדינט אלס א פאבליק שולע אויף די בלומינגראוו טורנפייק גאס, שטייען עטליכע גרויסע בנינים וואס איז גאר פאסיג פאר א ישיבה, און איז גרייט צו ארייננעמען די הונדערטער בחורים שוין אויפן קומענדיגן זמן הלימודים הבא עלינו לטובה.
נאכן אריינגיין אין קאנטראקט אפצוקויפן דעם קאמפלעקס, איז דעם דאנערשטאג תזריע טהרה פארגעקומען א ספעציעלע אסיפה בביתו נאוה קודש פון כ"ק אדמו"ר מסקווירא שליט"א, וואו דער רבי האט אויפגענומען א פרישע וועד פון חשובע מחנכים און עסקנים, צו פאראויסרוקן דעם פראיעקט עס צו ברענגען לידי גמר, די מקח זאל געשלאסן ווערן בכי טוב, און די ישיבות הקדושות זאלן זיך טאקע קענען קובע זיין דארט אויפן פלאץ אויפן קומענדיגן זמן הבעל"ט.
