אידישע קינדער איבער די גארער וועלט זענען מרבה בתפילה ובתחנונים דעם היינטיגן טאג דינסטאג פרשת אמור, אין די צייט וואס כ"ק אדמו"ר מקאלוב שליט"א לרפואה שלימה גייט אריבער א קאמפליצירטע פראצעדור מיטן האפענונג צו פארגרינגערן דעם רבינ'ס געזונט צושטאנד.
ווי באקאנט ליידט דער רבי שליט"א פון די ביטערע ALS מחלה ה"י שוין ארום צען יאר, דורכאויס די יארן האט מען מיטגעהאלטן פארשידענע עליות און ירידות, און אין די לעצטע פאר וואכן איז אויסגעשמועסט געווארן דורך הויכראנגיגע פראפעסארן איבער די שטארקע הצלחה וואס א געוויסע פראצעדור קען האבן, עס זאל בעסער אויסווירקן אויפן רבינ'ס געזונט צושטאנד. נאך די באשלוס דורכצופירן דעם פראצעדור איז עס באשטימט געווארן אויף היינט דינסטאג, און עס ווערט דורכגעפירט אין די פריע נאכמיטאג שעות אין די מעיא קליניק אין ראטשעסטער מינעסאוטע.
היינט אינדערפרי איז דער רבי שליט"א ארויסגעפארן ממעון קדשו אין וויליאמסבורג אויפן וועג קיין מינעסאוטע, מיט א פריוואטע פליגער אין באגלייטונג פון א מעדיצינישע שטאב פון פראפעסיאנאלע דאקטוירים, און די האפענונג איז אז דער רבי זאל שוין קענען צוריקקומען אהיים אין די גאר נאנטע טעג, צו נאך אפילו היינט שפעטער אין אין טאג.
אידישע קינדער זענען מתפלל און זענען מעורר רחמים לרפואתו השלימה פונעם רבי'ן, אין ביהמ"ד קאלוב אין וויליאמסבורג קומען פאר עטליכע מניני תהלים, און אזוי אויך אין פילע בתי מדרשים והיכלי הישיבות, וואו מען טוט מתפלל זיין אויף די גענצליכע רפואה פונעם רבי'ן און די פראדוקטיווע הצלחה פונעם היינטיגן פראצעדור, כ"ק מרן משה בן ריזל שליט"א זאל זיין געזונט און שטארק און ווייטער קענען משפיע זיין לארץ ולדרים כדרכו בקודש.
