דעם זונטאג איז פארגעקומען א אייגענארטיגע אסיפה רבתי אין די פראכטפולע זאלן פון ויואל משה אין וויליאמסבורג, אויפן רוף פון הנהלת קהל יטב לב ד'סאטמאר און די עסקני הקהילה, מיטן ציהל צו ברענגען אויפוואכונג ביים ציבור איבער די נושא פון "מענטל העלט", וואס איז גאר שטארק פארשפרייט געווארן אין די לעצטע תקופה.
אויפן בימת הכבוד האבן זיך אנגעזעהן די שרי התורה חברי ביד"ץ דקהל יטב לב ד'סאטמאר און די רבני הקהילה, די קינדער פון כ"ק אדמו"ר מסאטמאר שליט"א און נאך חשובע מרביצי תורה, מיטן דבר השם זו הלכה האט אויפגעטרעטן הגה"צ ר' זושא אויש שליט"א מו"ץ בקהל יטב לב ד'סאטמאר לעניני רפואה, וועלכער איז גאר שטארק אויסגעקאכט בדרכי הרפואה בגוף ובנפש.
די טויזענטער פלעצער איז געווען איבערגעפולט מיט חסידים אנשים זקנים עם נערים, און מען האט זיך צוגעהערט פאר לאנגע שעות צו אינהאלטסרייכע דרשות און שמועסן, פארשידענע וויכטיגע יסודות בתורת הנפש, און צו וויסן מיט א קלארקייט וואס איז אויסגעהאלטן און וואס נישט, און צו וועלכע באהאנדלונגען איז ריכטיג צו גיין און וועלכע נישט.
אלס יושב ראש האט אויפגעטרעטן הרב יצחק שווייד שליט"א מדריך במפעל בית נאמן שע"י קהל יטב לב ויו"ר מפעל כפים, הרב החסיד ר' אלכסנדר ארנשטיין הי"ו פרעזידענט פון די באקאנטע רעליעף ריסאורסעס האט פארגעשטעלט שאלות צו פארשידענע עסקנים און נפשיות'דיגע מומחים, ר׳ נפתלי אלימלך ווייס הי״ו, מנהל ישיבת לבנת הספיר - חוש, וחבר הנהלת פתח תקוה; מוה״ר מנחם ישעי׳ לעווי הי״ו, קאָאָרדינעטער פון ביקור חולים מענטל קעיר; מוה״ר יואל דרוממער הי״ו, קעיר מענעדזשמענט אין קאמפארט העלטה; מוה״ר הערשל ווערטהיימער הי״ו, עקזעקיוטיוו דירעקטאר פון סיפּוק קליניק; הרב אשר מענדל כהנא שליט״א מנהל פון ביקור חולים מענטל קעיר; מוה״ר משה נחום בראדט הי״ו פון או.די.עי. מענטל דעפּארטמענט, מוה״ר אביגדור מענדלאוויטש הי״ו; און מוה"ר משה שמואל לאנדא הי"ו מייסד פון די וואוילטעטיגע ארגענעזאציע רפואה העלפ-ליין.
