טויזענטער תושבי לאנדאן הבירה האבן מיטגעהאלטן א זעלטן געהויבענע ערשטמאליגע מעמד ההדלקה, ווען דער משפיע הגה"צ ר' שמואל שמעלקא בידערמאן שליט"א מלעלוב, האט געפראוועט אן הדלקה ברוב עם, גייענדיג אין די פיסטריט פון זיינע גרויסע ברידער האחים המשפיעים מלעלוב, די ברידער האדמורי"ם מלעלוב שליט"א פון אמעריקע, הגה"צ המשפיע ר' אלימלך בידערמאן שליט"א, הגה"צ המשפיע ר' נחמן בידערמאן שליט"א, און הגה"צ המשפיע ר' חיים יוסף בידערמאן שליט"א אב"ד לעלוב בני ברק.

די גרויסע ערשטמאליגע הדלקה איז אהערגעשטעלט געווארן אינעם חצר פון מוסדות יסודי התורה אין די סטעמפארד הילל געגנט, און האט צונויפגעברענגט א ריזן ציבור תושבי העיר, געשאצט ארום צוויי טויזענט אידן, זקנים עם נערים, וואס האבן זיך דערווארעמט אויפן לעלובער שטייגער ביים חשובן משפיע. די מעמד איז פארגעקומען פרייטאג נאכמיטאג ל"ג בעומר נאך חצות, נאך וואס די קינדערלעך זענען אהיימגעקומען פון חדר, און האט זיך געצויגן פאר לאנגע שעות אינעם לאנג פארצויגענעם ערב שבת נאכמיטאג.

די העכסט מוצלח'דיגע מעמד איז אנגעפירט געווארן דורך צוויי טאלאנטפולע אינגעלייט, הר"ר אלכסנדר ראזענבערג הי"ו און הר"ר זלמן גאלדמאן הי"ו, פון די RG פראדאקשען פירמע, וואס האבן שוין באוויזן אהערצושטעלן זעלטן היסטארישע מעמדים פאר די לאנדאנע אידנטום מיט גרויס הצלחה.