יעצט ביינאכט אין ארץ ישראל, האבן די גדולי ישראל בארץ הקודש זיך צוזאמגענומען אויף א געמיינזאמע אסיפה אינערהאלב מועצת גדולי התורה פון אגודת ישראל, צו אדורכטון די וויכטיגע ענינים העומדים על הפרק, וועלכע שריט צו נעמען אנבאלאנגט די רעגירונג צוזאמפאל אין מדינת ישראל, און וועלכע מהלך צו נעמען אפצושלאגן די גזירת הגיוס וואס הויערט אויף אחינו בני ישראל דרי ארץ הקודש.
די אסיפה איז פארגעקומען אינעם אכסניא פון כ"ק אדמו"ר מוויזניץ שליט"א אין מושב אורה נעבן ירושלים, אויפן ארט האבן זיך געפונען כ"ק האדמורי"ם מוויזניץ, גור, באיאן, סערט וויזניץ, מודזיץ, און ביאלא שליט"א. דאס איז די ערשטע מאל וואס כ"ק אדמו"ר מביאלא שליט"א נעמט אנטייל ביי א מועצת פון די גדולי התורה, נאכן ווערן אויפגענומען אלס חבר המועצת, ממלא מקום אביו כ"ק אדמו"ר מביאלא זצ"ל בעל מבשר טוב.
ביים אסיפה איז אויסגעשמועסט געווארן די אנגייענדע רייבערייען צווישן די פרומע און די פרייע וואס ברענגט צו א רעגירונג צוזאמפאל, דערביי האבן די גדולי האדמורי"ם באשלאסן אז זייערע פארשטייער די חברי הכנסת זאלן פארלאזן די קאאליציע, וואס וועט ווי פארשטענדליך שטארק אויפשאקלען די גאנצע רעגירונג.
