א היסטארישע אנטוויקלונג האט זיך אפגעשפילט היינט על אדמת ניו יארק, ווען דאס יהדות החרדית בארצות הברית האט מקבל געווען בהדרת כבוד כ"ק אדמו"ר מגור שליט"א וועלכער איז אנגעקומען אויף א דריגענדע באזוך צו שאפן מיליאנען לטובת די ניי געגרינדעטע קרן הצלת עולם התורה – גור, צו שטעלן א פינאנציעלע עתיד פאר די ישיבות און כוללים דחסידי גור, אין ליכט פון די גרויסע רעגירונגס שניטן צוליב די גזירת הגיוס.
אן קיין שום מודעות אדער סיי וועלכע פלאקאטן, האט זיך די אמעריקאנער אידנטום ערוועקט צו א היסטארישע באזוך, ווען דער רבי איז געקומען מיטן איינעם ציהל ארויסצוהעלפן די לומדי תורה, און אין א העכסט מוצלח'דיגע ערשיינונג האט זיך שוין די ערשטע טאג געשלאסן מיט א זעלטענע הצלחה ווען די אמעריקאנער גבירים האבן געגאסן שווערע מיליאנען פארן רבינ'ס קאסע, מיטן ערהאלטן ברכת הקודש פונעם רבי'ן אויף א פערזענליכע פארנעם.
דער רבי איז ארויף צו די שטיבער פון עטליכע נדיבי לב, פון אלע שיכטן און קרייזן, פון גערער נגידים ביז באבובער חסידים, סאטמארע און ליטווישע צוגלייך. ווען אלע זענען עלעקטעריזירט געווארן צו זעהן דעם רבינ'ס פייערדיגע בליק למען לומדי תורה, און די מסירת נפש צו העלפן די חשובע לומדי תורה וואס לערנען תורה מתוך הדחק, און דארפן פשוט האבן ברויט אויף צום לעבן.
פאר לאנגע מינוטן איז דער רבי געזעסן און פארברענגט מיט די נדיבי לב, מינוטן וואס ווערן פאררעכנט פאר לאנגע שעות אין גור, ווען דער רבי שענקט אויפמערקזאמקייט פאר יעדן באזונדער מיט גרויס ליבליכקייט.
דער רבי האט באשיינט א מסיבה אין שטוב פון הנגיד החסיד ר' בנימין בייטעל הי"ו, און שפעטער פארנאכטס איז פארגעקומען א פראכטפולע דינער אין שטוב פון הנגיד המפורסם ר' שלמה ווערדיגער הי"ו, בריח התיכון פון איחוד מוסדות גור. דארט האט מען געדאווענט מנחה, און דערנאך האט מען זיך געזעצט ביי רייך געדעקטע טישן, צענדליגע נגידים און וועלט בארימטע פילאנטראפן וואס האבן זיך געלאזט קאסטן פאנטאסטישע סכומים פארן רבינ'ס קאסע.
עס האט אויפגעטרעטן דעם רבינ'ס זון הגאון החסיד ר' נחמי' אלתר שליט"א, ער האט פארציילט אויף די שווערע מצב הפרנסה בארץ הקודש, און די געוואלדיגע מסירת נפש וואס זיין פאטער דער רבי שליט"א נעמט אונטער צו העלפן די לומדי תורה. דערנאך האבן גערעדט הגאון החסיד ר' משה חיים דענדראוויטש שליט"א ראש ישיבת שפת אמת דחסידי גור, און הגאון ר' הערשל ראטטענבערג שליט"א רב חסידי גור אין אמעריקע.
אצינד זעצט ווייטער פאר די זעלענע מסע הקודש ווען פילע נדיבי לב האבן שוין געבעטן אז זיי ווילן אויך זיין א טייל פון דעם היסטארישן רעוואלוציע, און לאדענען דעם רבי'ן אויף א באזוך אין שטוב, צו מען גרייט זיך אריינצוגיין אל הקודש פנימה איבערצוגעבן די תרומות הקודש, און זוכה זיין צו די לעכטיגע מאור פנים פונעם רבי'ן.
