א זעלטן התרגשות'דיגע מעמד וואס איז שוין לאנג נישט געווען אין היסטאריע פון כלל ישראל, האט זיך אפגעשפילט ברחובות העיר בארא פארק, ווען טויזענטער אידן אין שפיץ פון די אדמור"י ורבני העיר האבן זיך צוזאמגענומען לפונדק אחד, אויף די צוועלפטע עוועניו פארנט פון די פראכטפולע בנין התלמוד תורה, צו פייערן די חגיגה חנוכת הבית, אין שפיץ פונעם מנהיג העדה דער חשובער גאסט כ"ק אדמו"ר מגור שליט"א.
אויפן בימת הכבוד האבן זיך אנגעזעהן פילע אדמורי"ם ורבנים וואס זענען געקומען באשיינען די מעמד, און זיך וואונטשן מיטן גערער רבי'ן שליט"א בהאי עידן חדוותא. צווישן די מסובים האבן זיך באטייליגט כ"ק האדמורי"ם מבאבוב 45, צאנז קלויזענבורג, טשערנאביל, ראחמיסטריווקא, וויזניץ פון ב"פ, לעלוב, ספינקא, אמשינאוו ארה"ב, ווערדאן פון ב"פ, אונגוואר, צאנז, אבד"ק אמונת ישראל, הגה"צ דומ"ץ באבוב, דומ"ץ סקווירא ב"פ, אבד"ק גרויסווארדיין סטעטן איילענד, און נאך חשובע רבנים ומורי הוראה.
עס האבן אויפגעטרעטן א רייע בעלי דרשנים, וועלכע האבן אלע אייניג ארויסגעברענגט די געוואלדיגע דערגרייכונג, מיט די מסירת נפש וואס איז אריינגעלייגט געווארן צו דערגרייכן אט דעם מאמענט, אכט יאר פון שווערע הארעוואניע אוועקצושטעלן דעם תלמוד תורה על אדני התורה והחסידות, אויפן גענויעם וועג ווי די תלמודי תורה דחסידי גור בארץ הקודש צו שטייגן בתורה וחסידות בדרך המסורה.
עס האבן אויפגעטרעטן ביידע קינדער פונעם רבי'ן וואס זענען געקומען צו פארן בצל הקודש, הגה"צ ר' נחמיה אלתר שליט"א, און הגה"צ ר' ישראל נחמי' אלתר שליט"א. מען האט געהערט א פייערדיגע דרשה פונעם מרא דאתרא פון חסידי גור אין אמעריקע הרה"ג ר' הערשל ראטטענבערג שליט"א, און א דרשה פונעם גערער ראש ישיבה אין בארא פארק הרה"ג ר' ישראל משה אלעווסקי שליט"א, און הרה"ג ר' יעקב חיים ברוך אבראמאוויטש שליט"א.
עס האבן גערעדט די חשובע מנהלים און עסקנים וואס האבן געהארעוועט למען הצלחת התלמוד תורה, הרב חיים פאמעראנץ, הרב אברהם שמידט, הרב אהרן דוד קאפלאוויטש, און הנגיד החסיד המפואר ר' מאיר פריי הי"ו. הנגיד החסיד ר' משה עקשטיין הי"ו האט פארגעזאגט א קאפיטל תהלים לרגל המאורע, און הנגיד החסיד ר' יעקב קליין הי"ו האט געשלאסן די רייע בעלי דרשנים מיט רירנדע ווערטער.
די חשובע בעלי שמחה די תינוקות של בית רבן זענען געזעסן אינדערמיט אנגעטון מיט שיינע קרוינען, צו זייער זייט זענען געזעצט געווארן די בעלי שמחה חסידי גור אין אמעריקע, און שיינע ניגונים האט מען געהערט פון א הערליכע קאפעליע באגלייט מיט א רייכע ארקעסטרא לכבוד די גרויסע חגיגה.
צום הויכפונקט פונעם מעמד האט מען געהאט די זכיה צו הערן ברכת הקודש פון כ"ק אדמו"ר מגור שליט"א, וועלכער האט אנגעוואונטשן ברכות פארן גאנצן ציבור ברוחניות ובגשמיות, נחת פון די קינדער, תורה יראת שמים און הצלחה. דאן זענען אלע באטייליגטע אריבער ביים רבי'ן ערהאלטן א פרי, און די קינדערלעך האבן באקומען א טשאקאלאדע.
די פראכטפולע מעמד איז געווארן אהערגעשטעלט דורך די מייסטער אראנדזשירונג פון די וויי עף פראדאקשען פירמע, וועלכער האט באוויזן וואונדער צוצושטעלן אזא הערליכע מעמד אין געציילטע שעות, כדי נישט צו שטערן די טראפיק פלוס די גאס זאל נישט זיין פארשלאסן פאר צו לאנג. אלע טעכנישע איינריכטונגען ווי די טויזענטער בענקלעך און פלאטפארמעס, איז געווארן אהערגעשטעלט דורך די בארימטע רענטעסטיק פארטי רענטל פירמע.
