בביתו נאוה קודש פון כ"ק אדמו"ר מתולדות אברהם יצחק שליט"א אין ירושלים עיר הקודש, איז פארגעקומען היינט א שיינע שמחה משולשת, שמחת השבע ברכות פאר דריי חתנים, וואס האט משלב געווען די גרויסע שמחה במעונם פון פיר ברידער, כ"ק אדמו"ר מתולדות אברהם יצחק שליט"א, כ"ק אדמו"ר מתולדות אהרן שליט"א, הגה"צ ר' משה קאהן שליט"א ראש ישיבת תולדות אהרן, און הגה"צ ר' ישראל חיים קאהן שליט"א אדמו"ר מנחלת אהרן ורב חסידי תולדות אהרן אין בית שמש.
די פרייליכע שמחה איז אפגעראכטן געווארן עטליכע טעג נאך די פרייליכע חתונות, וואס איז פארגעקומען פארלאפענע וואך דינסטאג אין אלע דערמאנטע רעבישע הויפן, ווען אין איין נאכט איז פארגעקומען דריי חתונות פון אייניקל ביי כ"ק אדמו"ר מתולדות אהרן זצ"ל אין ארץ ישראל, און נאך א פערטע חתונה פון א אייניקל ביים רבי'ן זצ"ל אין אמעריקע.
די שמחת החתונה בחצר הקודש תולדות אברהם יצחק, איז געווען דער חתן א זון פונעם רבי'נס זון הגה"צ ר' יואל קאהן שליט"א רב הקהילה אין רמה ד' בית שמש, די שמחת החתונה בחצר הקודש תולדות אהרן איז געווען די כלה א טאכטער פונעם רבינ'ס זון הגה"צ ר' אהרן קאהן שליט"א אב"ד תולדות אהרן מאנסי, מיט די חתן א זון פון הגה"צ ר' יואל קאהן שליט"א, זון פון הגה"צ ר' משה קאהן שליט"א ראש ישיבת תולדות אהרן א ברודער מיט די רבי'ס, און די שמחת החתונה בחצר הקודש נחלת אהרן איז געווען די כלה א טאכטער פונעם רבינ'ס איידעם הגה"צ ר' אביגדור פאללאק שליט"א, מיט די חתן א אייניקל פון כ"ק אדמו"ר ממאחנובקא בעלזא שליט"א.
היינט מאנטאג נאכמיטאג איז פארגעקומען די שיינע שבע ברכות פאר אלע שמחות בינאזאם, מיט די באטייליגונג פון אלע ברידער בחיים, דער זיידע כ"ק אדמו"ר מתולדות אברהם יצחק שליט"א, דער זיידע כ"ק אדמו"ר מתולדות אהרן שליט"א, דער זיידע הגה"צ ראש ישיבת תולדות אהרן שליט"א, דער זיידע כ"ק אדמו"ר מנחלת אהרן שליט"א, און דער יונגסטער ברודער כ"ק אדמו"ר ממבקשי אמונה שליט"א וועלכער איז פינף מאל א פעטער, און האט אויפגעטרעטן מיט רירנדע ווערטער לכבוד די שמחה המשולשת.
