היינט מיטוואך איז כ"ק הגה"צ גאב"ד מאקאווא שליט"א ב"ה אנגעקומען בשלום קיין ארץ ישראל, נאכן זיין געשטראנדעט אין אונגארן צוליב די שרעקליכע מלחמה צושטאנד אין ארץ ישראל.
דער מאקאווא רב שליט"א איז ווי יאר יערליך ארויסגעפארן קיין אונגארן צו פוקד זיין דעם ציון הק' פונעם זיידן הגה"ק בעל אהל משה ממאקאווא זי"ע וואס געפאלט י"ז סיון, דער רב האט זיך געזאלט אומקערן אהיים קיין ארץ ישראל באלד נאך שבת, שטייענדיג בעפאר די שמחת החתונה פון א אייניקל, די כלה א טאכטער פון זיין איידעם הגה"צ ר' אהרן מרדכי רוקח שליט"א מבעלזא, וואס קומט פאר היינט מיטוואך אין קרית בעלזא ירושלים.
צוליב די פארשלאסענע לופט רוימען אין ארץ ישראל אין ליכט פון די מלחמה צושטאנד, האט מען זיך דערזעהן אן קיין וועג אהיים. מערערע שתדלנות און פעולות איז געמאכט געווארן אין לויף פון די לעצטע פאר טעג, און ענדליך האט מען אויסגעארבעט א וועג דורך ירדן, ווען דער רב שליט"א האט זיך ארויסגעלאזט אין וועג אינמיטן די נאכט מיט א פריוואטע פליגער פון בודאפעסט צום שטאט עקבה אין ירדן.
אנקומענדיג קיין ירדן היינט צופרי האבן אפגעווארט א ספעציעלע זיכערהייט באגלייטונג וואס האבן באגלייט דעם רב ביז צום ארץ ישראל'דיגע גרעניץ, און בחסדי השם איז דער רב שליט"א אנגעקומען קיין ירושלים עיה"ק וואו ער באשיינט בראש השמחה ביי די געהויבענע חתונה אין קרית בעלזא ירושלים.
