מיט בלויז צוויי שעה פארבליבן טוען די הערצער פון טויזענטער חסידי גור און תושבי בארא פארק שטורעמען מיט התרגשות, זיך גרייטענדיג צו מיטהאלטן די היסטארישע חגיגה חנוכת הבית פאר די נייע בנין התלמוד תורה אמרי אמת דחסידי גור, וואס וועט זיין די איינציגע מעמד במקהלות אלפי ישראל, אין לויף פונעם יעצטיגן באזוך פון כ"ק אדמו"ר מגור שליט"א על אדמת ארה"ב.
די מעמד וועט זיך בעז"ה אנהייבן צוויי אזייגער מיטאג, און וועט צונויפברענגען א ריזן ציבור חסידים ואנשי מעשה, אין שפיץ פון די גדולי רבני ואדמור"י העיר וואס וועלן זיך קומען מיטפרייען און מיטהאלטן דעם היסטארישן מעמד. די בארימטע וויי עף פראדאקשען פירמע אין שפיץ פונעם לעגענדארן עסקן ר' יוחי פליישמאן הי"ו ארבעטן העפטיג אויסצושטעלן אלע לאגיסטישע דעטאלן, די גאס פארנט פון די בנין התלמוד תורה וועט זיין פארשלאסן צו קענען אקאמאדירן דעם ריזן ציבור, די מענער וועלן זיין אויפן ריכטונג פון די פיר און זעכציגסטע סטריט, און די פרויען אויפן ריכטונג פון די דריי און זעכציגסטע סטריט, מיט א מייסטער ספעציעלע אויסשטעל אז יעדער איינער זאל גוט קענען מיטהאלטן.
די גיגאנטישע בנין התלמוד תורה איז אין די לעצטע פאר יאר אריבער העפטיגע בוי ארבעט צו קענען דינען אלס אכסניא של תורה, און מיט דריי חדשים צוריק, ביומא דהילולא קדישא פונעם הייליגן בית ישראל פון גור זי"ע האט מען זיך אין א מזל'דיגע שעה אריינגעצויגן דערין מיט גרויס הרחבת הדעת, א גיגאנטישע געביידע פון עטליכע שטאק, צענדליגע קלאס צימערן און נאך פריוואטע צימערן, א ריזן חדר אוכל און א פראכטפולע היכל בית המדרש.
אין די לעצטע צוויי שעה פארבליבן צום מעמד זעהט זיך אן די לעצטע צוגרייטונגען דורך די בארימטע רענטעסטיק פארטי רענטל פירמע וואס שטעלט אהער אלע פלאטפארמעס, באריקאדן, און די טויזענטער בענקלעך פאר די פילצאליגע משתתפים וואס זענען ערווארטעט.
