היינט קומט פאר די מעמד סיום מסכת סוטה אין ק"ק פאפא מאנסי, געלערנט געווארן דורך די חברי הקהילה במסגרת הלימוד והגית דחסידי פאפא, עס קומט פאר אין ביהמ"ד הגדול פאפא אין מאנסי, אין שפיץ פון כ"ק אדמו"ר מפאפא שליט"א וועלכער וועט דערביי מעריך זיין שולה"ט לכבוד ראש חודש.
היינט קומט פאר די יערליכע דינער אין בארא פארק לטובת מוסדות וויזניץ אין קייאמישע לעיק, עס קומט פאר אין בית אסתר זאל אין בארא פארק, כ"ק אדמו"ר מוויזניץ שליט"א פון קייאמישע וועלכער האט געוויילט אויף א מסע הקודש אין אייראפע אינאיינעם מיט די תלמידי הישיבה, וועט זיך היינט נאכט צוריקקערן אהיים קיין ניו יארק, און אנקומען קיין בארא פארק צו באשיינען די מסיבה.
שמחת בית ספינקא: עס איז געשלאסן געווארן די שידוך פון א אייניקל ביי כ"ק אדמו"ר מספינקא שליט"א, די חתן עלטסטע זון פון זיין זון הגה"צ אבד"ק ספינקא לעיקוואד שליט"א, איידעם ביי הגה"צ אבד"ק בערטש שליט"א, מיט די כלה א טאכטער פון הגה"צ ר' חיים ארי' שפיטץ שליט"א ראש ישיבת עץ חיים ווילרייק, איידעם ביי הגה"צ ר' חיים יוסף דוד ווייס שליט"א דומ"ץ סאטמאר אנטווערפן. – די שמחת התנאים קומט פאר היינט אויפדערנאכט אין זאל פון ביהמ"ד החדש אלכסנדר אין בארא פארק.
היינט קומט פאר די שמחת התנאים פונעם חתן א זון פון הגה"צ ר' יעקב רובין שליט"א אבד"ק מוזשאי, זון פון כ"ק אדמו"ר מראפשיץ שליט"א, און איידעם ביי הגה"צ ר' חיים האלבערשטאם שליט"א אבד"ק פאקשעוויץ, מיט די כלה א טאכטער פון הגה"צ ר' מנחם מענדיל האגער שליט"א אבד"ק ווישיווא מאנסי, איידעם ביי הגה"צ ר' אשר זעליג גרינבערג זצ"ל ראש ישיבת שער אפרים. – די שמחה קומט פאר אין ניקלשבורג זאל אין מאנסי.
כ"ק אדמו"ר מסלאנים שליט"א וועלכער איז צוגאסט די טעג אויף א מסע הקודש אין אייראפע אינאיינעם מיט נגידים ותומכים, וועט היינט פוקד זיין די קברי אבות, קברי צדיקים אין די שטעט סלאנים און קאברין, לרגל די יומא דהילולא קדישא פון הרה"ק רבי משה קאברינער זי"ע וואס געפאלט היינט, און די יומא דהילולא קדישא פונעם הייליגן בית אברהם פון סלאנים זי"ע וואס געפאלט היינט נאכט ראש חודש אייר.
כ"ק אדמו"ר מפארשעי שליט"א קומט היינט אן קיין עיר התורה לעיקוואד, לקראת די יומא דהילולא קדישא פון זקינו הרה"ק רבי ישעי'לע קערעסטירער זי"ע, און וועט אפרעכטן היינט אויפדערנאכט א סעודת ראש חודש אין די עסטריע זאל אין שטאט.
כ"ק אדמו"ר מקוידינוב שליט"א לאזט זיך היינט ארויס אויפן וועג קיין לאס אנדזשעלעס, וואו דער רבי וועט וויילן די קומענדיגע וואך לטובת מוסדותיו הקדושים.
לרגל די יומא דהילולא קדישא פון הרה"ק בעל כנסת מרדכי מסאדיגורא זי"ע וואס געפאלט היינט זונטאג, וועט נכדו כ"ק אדמו"ר מסאדיגורא שליט"א ארויפגיין צום ציון הק' היינט נאכמיטאג אויפן בית החיים נחלת יצחק אין גבעתיים, און שפעטער פארנאכטס אפרעכטן די יארצייט טיש אינעם גרויסן סאלאש ביי ביהמ"ד סאדיגורא אין בני ברק.
