פיבערהאפטגיע הכנות צום היסטארישן מעמד זענען אין פולן שוואונג דורך מצא טוב עסקנים, ראשי קהלה, און מייסטער פלאנירער פון כלל ישראל'ס גרעסטע מעמדים
מאנסי, נ.י. – די גאסן פיבערן, די געמיטער זענען אויפגעהייטערט, 'מצא טוב' איז די נייע מדובר אין שטאט. די עקסטאז איז אומבאשרייבליך, און רירט אן צו רוב רובם פונעם יהדות החרדית. א קריזיס וואס פלאגט שוין כלל ישראל פאר יארן, אן אומעטיגע זארג וואס עגבערט די געוויסן פון רוב אידן, 'וויאזוי וועלן מיר קענען דעקן די הוצאות החתונה פון מיינע קינדער?' אט דער זארג ווערט אין די יעצטיגע טעג געשליכטעט. אט אט וועט פירן א קינד אונטער די חופה צוריק ווערן א שלימות'דיגע שמחה.
טויזענטער תושבי מאנסי והגלילות גרייטן זיך צום היסטארישן כינוס, וואס וועט אי"ה טוישן דעם גאנצן עתיד פון חתונה מאכן, און וועט אוועקשניידן די אלע איבערגעטריבענע און אויפגעבלאזענע סטאנדארטן וואס זענען צוגעקומען במשך די יארן, און וועט צושטעלן אלע מעגליכקייטן אז יעדער איינציגער איד זאל קענען חתונה מאכן א קינד בדרך כבוד, אן קיין חרפות און בושות.
עס הערט זיך אפשר ווי א פאנטאזיע, אבער צו די פרייד פון תושבי מאנסי איז עס שוין ב"ה א פאקט, א רעאליטעט, א מציאות וואס האט שוין געברענגט דערלייכטערונג פאר הונדערטער מחותנים.
דער 'מצא טוב' ארגאניזאציע אנגעפירט דורך א קבוצה פון וואוילטעטיגע פילאנטראפן, האבן באשלאסן אז זיי וועלן טון אלע אין די וועלט צו שליכטן דעם קריזיס, און האבן אריינגעלייגט איבער צוויי יארן פון איבערמידליכע ארבייט צו דערגרייכן דעם מאמענט, ווען מען קען צוזאם נעמען דעם גאנצן שטאט, און אנאנסירן דעם היסטארישן דורכברוך.
און די גרעסטע אויפטו איז, אז עס איז נישט בלויז א פלאן, נאר עס איז שוין א רעאליטעט וואס איז שוין איינגעפירט געווארן אין קהלת וויזניץ אין מאנסי, ווי רוב רובם פון די מחותנים מאכן שוין חתונה לויט דעם מצא טוב פלאן, אבער נישט נאר וויזניץ נאר אומצאליגע בעלי שמחה פון אנדערע קהלות, און אפילו פון אנדערע שטעט האבן זיך שוין אנגעשלאסן אינעם מצא טוב רעוואלוציע.
פארוואס וואקסט עס אזוי שנעל? זייער פשוט, ווייל ס'דא א כלל אין די ביזנעס וועלט, אז צופרידענע קליענטן ברענגען נאך קליענטן. די זעלבע איז דא, מצא טוב איז טאקע נישט קיין ביזנעס, אבער די צעפרידענע מחותנים וואס טרעפן זיך צומארגנס פון שבע ברכות אן קיין געשוואלענע חובות, ברענגען אן ענדלאזע פלייץ פון פרישע מחותנים וואס ווילן אויך שפירן דעם זעלבן טעם.
די ציל פונעם היסטארישן כינוס איז פשוט, ווייל צו קענען אדורך ברעכן א געוואוינהייט פון גאנץ כלל ישראל, פארלאנגט זיך א מעכטיגן כח הרבים, עס פארלאנגט זיך אז טויזעטער אידן זאלן זיך צוזאם קומען אונטער איין דאך, און אויסשרייען הננו!, מיר זענען גרייט אינאיינעם צו מאכן דעם טויש, מיר זענען גרייט אינאיינעם צו ברענגען דערלייכטערונג פאר זיך און פאר אלע מיינע חברים, קרובים, שכנים און בני העיר.
אין צוגאב צו דעם, האט זיך ארויסגעשטעלט אלס א דבר ברור, אז די שטערקסטע סיבה פארוואס פילע אנדערע חתונה פלענער עד היום זענען דורכגעפאלן, איז געווען צוליב דעם וואס עס האט געפעלט דעם כח הרבים, און בעלי שמחה האבן זיך נישט געוואלט שפירן 'אנדערש ווי יעדן'. דאס איז א פראבלעם וואס דער כינוס וועט בעזהשי"ת לעזן.
אין כדי דער כינוס זאל טאקע ברענגען די ריכטיגע און געוואונטשענע רעזולטאטן, האבן די עסקנים איינגעשפאנט די גרעסטע מייסטער ארגאניזירער פון די גרעסערע מעמדים ביי כלל ישראל, צו פארזיכערן אז יעדע פרט ופרט ווערט אינזינען געהאט, און אז די באטייליגטע זאלן הנאה האבן און אהיים קומען מיטן פעסטע החלטה, אז דער עבר פון חתונה מאכן איז א פארגאנגענהייט, די אלט מאדישע מהלך פון פארשווענד איבער הונדערט אלפים אויף א חתונה איז 'ארויס פון סטייל', און מהיום והלאה איז דא א פרישע מהלך, מען שפארט געלט, מען מאכט חתונה אחריות'דיג, מען דארף שוין נישט בארגן אן קיין חשבון.
אין די יעצטיגע טעג קומען פאר העפטיגע אסיפות עסקנים, סיי צווישן די מצא טוב אין די עסקני הקהלות, און סיי אינערהאלב די קהלות אליין צו פארזיכערן די הצלחה פון דעם פרישן באוועגונג, און צו פארזיכערן אז דאס מאל וועט מען איינמאל פאר אלעמאל אדורכברעכן דעם קריזיס.
ביים כינוס וועלן תושבי מאנסי האבן דעם געלעגנהייט צו באקומען א קלארן בליק איבער דעם ביטערקייט פון דעם קריזיס, עד היכן הדברים מגיעים, א פענאמענאן וואס געוויסע האבן נאך נישט בייגעוואוינט, ספעציעל די יונגערע יונגעלייט וועלכע האבן נאך נישט חתונה געמאכט קיין קינדער. ווי אויך וועט מען הערן פונקטליכע דעטאלן פון די עסקנים, מען וועט הערן פון מחותנים וועלכע האבן שוין חתונה געמאכט מיט מצא טוב, אא"וו.
אבער די קלימאקס פונעם נאכט וועט זיין א נייע חידוש נפלא וואס וועט צום ערשטן מאל פראקלאמירט ווערן ביים כינוס, וואס דאס אליין וועט ברענגען אן אויסערגעווענליכן דערלייכטערונג פאר א ריזן טייל פונעם ציבור, נאך פיל מער ווי מען האט ביז יעצט פארעפנטליכט.
די באטייליגטע וועלן אויך אהיים נעמען פונעם כינוס א בראשור וואס וועט דעטאלירן דעם פונקליכן פלאן, און צייגן די פרטים פון די פרישע סטאנדארטן, וואס זענען באמת נישט קיין נייע סטאנדארטן, נאר פשוט צוריק געברענגט די נארמאלע סטאנדארטן, וואס איז רעאליסטיש פאר אלע מחותנים וואס זענען נישט קיין מיליאנערן.
ווי אויך וועט עס דעטאלירן די פונקטליכע צרכי החתונה וואס מען קען באקומען אינעם הערליכן הארמאני שאו-רום צוגעשטעלט דורך מצא טוב, און די פרייזן פון די פעקעדזשעס. עס וועט צייגן וויאזוי דורכשניטליכע מענטשן קענען חתונה מאכן בדרך כבוד פאר אונטער פופציג אלפים.
דער כינוס וועט מיטן אויבערשטנס הילף פארקומען דעם קומענדיגער פסח שני הבעל״ט אין די גיגאנגטישע RCC זאלן, וועלכע וועט געגרייט ווערן צו אקאמאנדירן דעם ערווארטעטן ריזן ציבור.
אין די קומענדיגע טעג וועלן פארעפנטליכט ווערן מער פרטים איבער דעם כינוס. קוקט ארויס אויף די ווייטערדיגע מעלדונגען.
