מיט געציילטע שעה פארבליבן צום היסטארישן כינוס אדיר להקהל, וואס קומט פאר היינט ביינאכט אין די גיגאנטישע זאלן פון RCC אין מאנסי, מיט די באטייליגונג פון צענדליגע טויזענטער תושבי מאנסי, ווערט באריכטעט איבער א העכסט מוצלח'דיגער מסיבה נחוצה וואס איז פארגעקומען נעכטן ביינאכט אין שטוב פון הנגיד המפואר ר' אליעזר שיינער הי"ו, שטייענדיג אין די פיר און צוואנציג שעה בעפאר די מעמד, צו באארבעטן און פארזיכערן די מאקסימום הצלחה פונעם מצא טוב רעוואלוציע.
די רייכע מסיבה איז געווען געווידמעט פאר א געקליבענע צאל נגידים ושועים, אינאיינעם מיט די ראשי ההנהלה פון די גרעסערע מוסדות אין שטאט, וואו מען האט דורכגעטון פארשידענע וועגן וויאזוי ארויפצוארבעטן די מאקסימום הצלחה פון "מצא טוב", מיט נאך פארשידענע בענעפיטן וואס קען געגעבן ווערן פאר די אלע וואס שליסן זיך אן אין דעם מעכטיגן רעוואלוציע, א שטייגער ווי ספעציעלע שיינע אבער ביליגע חתונה זאלן, פארשידענע הילפס פראגראמען ארויסצוהעלפן אידישע קינדער בעת שמחתם, אין פאל די מחותנים טוען זייער אייגענע השתדלות ווי די נייע ביליגע סטאנדארטן בעז"ה.
בראש המסובים האט זיך אנגעזעהן הגה"צ ר' חיים פייוויל שנעעבאלג שליט"א אב"ד קהל אברכים אין מאנסי, וועלכער איז דער פאן טרעגער און רב המפעל מיום הווסדה, דער רב שליט"א האט אויפגעטרעטן מיט א הפלא'דיגע דרשה איבער דעם נושא, און אזוי אויך האט מען געהערט א וואונדערליכע דרשה פונעם מגיד מישרים ופה מפיק מרגליות הגה"צ אבד"ק לימינוב שליט"א.
אויך האט מען געהערט ווערטער פון א רייע עסקנים, מנהלי מוסדות און נגידים חשובים, וואס האבן געלאזט הערן חוות דעתם מיטן איינציגן ציהל ארויסצוהעלפן די מאקסימום הצלחה, צווישן אנדערע האבן אויפגעטרעטן הנגיד החסיד ר' הערש אלימלך פיש הי"ו פטרון המפעל, הר"ר אברהם שלום מענדלאוויטש הי"ו מראשי קהילת סאטמאר, הר"ר שלמה זלמן רייזמאן הי"ו אדמיניסטראטאר פון מוסדות סאטמאר, הר"ר שלום דוב ווידער הי"ו וועלכער פירט אן א נעץ פון ביליגע חתונה זאלן אין וויליאמסבורג, הר"ר שמואל זיינוויל ווערטהיימער הי"ו מראשי קהילת ומוסדות סאטמאר, הר"ר אשר זעליג אויסטערליץ הי"ו מראשי קהילת ומוסדות בעלזא, הר"ר ישעי' שלום וואסערמאן הי"ו מראשי מוסדות פאפא, הרבני הנגיד ר' יוסף מיללער הי"ו, און נאך.
עס איז אויסגעשמועסט געווארן די פאקט וואס מען זעהט אז הונדערטער מחותנים האבן זיך שוין מחיה געווען מיט דעם מצא טוב מהלך, צענליגער צעפרידענע פארפעלקער האבן שוין חתונה געהאט מיטן מצא טוב מהלך, און יעדער פון זיי איז העכסט צעפרידן. און דער חילוק צווישן די מצא טוב מהלך און אלע אנדערע חתונה פלענער פון ביז היינט, אז דער מצא טוב מהלך האט אנגעכאפט דעם קריזיס פון אלע זייטן, און געברענגט לעזונגען צו יעדן חלק פונעם קריזיס.
אצינד גרייט מען זיך צום היסטארישן מעמד, שטייענדיג בלויז געציילטע שעה אפגערוקט פון דעם מאסיוון רעוואלוציע אינערהאלב כלל ישראל'ס עקזיסטענץ.
תושבי מאנסי זענען מאביליזירט ווי קיינמאל בעפאר, און גרייטן זיך צו שטראמען אין די מאסן היינט אויפדערנאכט צום גיגאנטישן RCC קאמפלעקס אין מאנסי.
