מצא טוב איז די מדובר אין שטאט ביי יונג און אלט, אלע זענען פארנומען דערמיט, און יעדער קוקט ארויס מיט זעלטענע האפענונג אז עס זאל טאקע מצליח זיין און תושבי מאנסי זאלן זיך טאקע קענען שפארן צענדליגער טויזענטער דאלער ביים חתונה מאכן זייערע קינדער.
קהלות הקודש פון די גרעסטע ביז די קלענסטע האבן זיך אנגעשלאסן אין דעם רעוואלוציע, ווייל דאס איז באמת דער רצון פון יעדן איינעם, קיינער זוכט נישט אויסצוגעבן צענדליגער טויזענטער וואס מען האט נישט, און קיינער זוכט נישט צו בלייבן פארשמאכטעט אונטער בערג פון חובות. מיט יעדן טאג פארביי ערשיינט פרישע מודעות און קול קורא'ס פון אלע קהילות אין שטאט צוגלייך, צו פארזיכערן אז די חברי הקהילה זענען אנגעשלאסן אין די רעוואלוציע מיט די גאנצע שטאט, און פאלן נישט ארויס פון דעם היסטארישן פאראייניגונג.
עס איז ביי קיינעם נישט קיין ספק, אז עס מוז קומען א טויש, און טאקע דערפאר איז דא אזא פאראייניגונג צו דעם יעצטיגן מערכה. און דערפאר גרייטן זיך תושבי מאנסי אין די מאסן זיך צו באטייליגן אינעם מארגענדיגן גיגאנטישן מעמד, כדי צו קענען זיין א חלק פון דעם היסטארישן טויש, און העלפן צעמענטירן דעם נייעם מציאות אינעם שטאט.
ביים מעמד וועלן די באטייליגטע באקומען א קלארקייט איבער אלע פרטים פונעם מצא טוב מהלך, און הערן פון וועלט בארימטע רבנים, מגידים, און פינאנציעלע עקספערטן, איבער דעם נייעם מציאות אין מאנסי.
מחר יהיה האות הזה! מארגן הייבט זיך אן א נייע עפאכע אין מאנסי!
