אלפי חסידי וויזניץ איבער די וועלט און גאנץ כלל ישראל זענען דערפריידט צו הערן מיט דערלייכטערונג אז כ"ק אדמו"ר מוויזניץ שליט"א געפונט זיך שוין אויפן וועג אהיים פון לאס אנדזשעלעס, נאך גאנצע צוויי חדשים וואס דער רבי האט זיך דארט אויפגעהאלטן לצרכי רפואה, און אריבער א קאמפליצירטע אפעראציע צו היילן דעם רבי'ן פון די ביטערע מחלה ה"י, וואס איז מיטן אויבערשטנס הילף אריבער מיט גרויס הצלחה.
דער רבי האט זיך ארויסגעלאזט אין וועג ארום עלף אזייגער ביינאכט אויפן לאס אנדזשעלעס זייגער, און זיך געזעגנט פונעם בעל אכסניא הנגיד החסיד ר' שמואל בנימין איינהארן הי"ו וועלכער האט געעפנט זיין שטוב פארן רבי'ן און די מקורבים אזא לאנגע תקופה. מאמענטאל געפונט זיך דער רבי אויפן פליגער קיין דאוואס שווייץ, וואו דער רבי איז ערווארטעט צו וויילן פאר צוויי וואכן אויף אפרוה, און מיטן אויבערשטנס הילף צוריקקומען צו די כוחות לאיתנו הראשון, צו קענען ווייטער משפיע זיין פאר קהל עדת צאן מרעיתו וכל בית ישראל.
אין די זעלבע צייט טוען כלל חסידי וויזניץ די בכל אתר ואתר מתפלל זיין פארן רבי'נ'ס געזונט, איבערהויפט ווען מ'שטייט אצינד בלויז דריי טעג צום אכציגסטן יום הולדת פונעם רבי'ן, ווען מ'איז מתפלל אז דער רבי זאל זוכה זיין צו אריכת ימים ושנים טובים, בבריות גופא ונהורא מעליא.
שישים רבוא שעות רצופות
א ספעציעלע מודעה ערשיינט היינט אונטערגעשריבן דורך די דריי קינדער פונעם רבי'ן, הגה"צ ר' חיים מאיר האגער שליט"א אב"ד קרית וויזניץ, הגה"צ ר' יצחק ישעי' האגער שליט"א, הגה"צ ר' יעקב מרדכי האגער שליט"א אב"ד וויזניץ אלעד, און דעם רבינ'ס שוואגער הגה"צ ר' מנחם ארנסטר שליט"א. דערונטער זענען אונטערגעשריבן די פינף ראשי הדיינים אין די וויזניצע קהילה, און דער משמש בקודש הרב שאול גרינבערגער שליט"א וועלכער גיבט איבער דעם רבינ'ס הסכמה צו דעם פראיעקט.
אינעם בריוו שרייבן זיי אז שטייענדיג אין די ימי הספירה ווען גאנץ כלל ישראל גרייט זיך צום יום טוב פון קבלת התורה, איז פאסיג אונטערצונעמען א פראיעקט צווישן אלע וויזניצע חסידים צו מוסיף זיין שעות רצופות לזכותו ולרפואתו פונעם רבי'ן, צו גרייכן דעם נומער פון זעקס הונדערט טויזענט שעות רצופות כנגד די שישים רבוא נשמות ישראל, און די שישים רבוא אותיות שבתורה, די תורה הקדושה זאל אויספועל'ן פארן רבי'ן א גאנצע רפואה.
די שישים רבוא פראיעקט גייט אצינד אריין אין קראפט, ווען כלל חסידי וויזניץ זקנים עם נערים, אנגעהויבן פון די קינדערלעך אין חדר, די בחורי הישיבות, די כולל אינגעלייט, בעלי בתים און עלטערע אידן, וועלן אלע זיך אונטערנעמען א סכום שעות רצופות ביז יום טוב שבועות, און דערמיט גרייכן דעם פאראייניגטן סכום פון שישים רבוא, זעקס הונדערט טויזענט שעות רצופות לרפואתו ולחיזוק כוחותיו פונעם רבי'ן.
