שטייענדיג ווייניגער ווי צוויי וואכן בעפאר די היסטארישע אסיפה "להקהל", וואו צענדליגע טויזענטער תושבי מאנסי וועלן זיך צוזאמנעמען אויף א ערשטמאליגע פארנעם אוועקצושטעלן א פעסטע גרינדונג פאר די נייע "מצא טוב" רעוואלוציע, איז פארגעקומען א סטראטעגישע אסיפת העסקנים צו לאזן אין גאנג די פאקטישע הכנות צום היסטארישן כנסיה לשם שמים, וואס קומט פאר בעז"ה קומענדיגן פסח שני, מאנטאג פרשת אמור, אין די גיגאנטישע קאמפלעקס פון RCC.
ביים אסיפת עסקנים וואס איז פארגעקומען אין א זאל אין מאנסי, האבן זיך צוזאמגענומען צענדליגע עסקנים פון מערערע קהילות הקודש אין שטאט, וואס ארבעטן די טעג האנט ביי האנט צו פארזיכערן די מאקסימום הצלחה פון דעם כינוס, און פארזיכערן אז אידישע קינדער ווערן באפרייט פונעם שווערן און אומבאשרייבליכן עול וואס הייסט "חתונה מאכן א קינד", אריינצוברענגען דעם פרישן רעוואלאוציע און מאטעוואציע פון שפארן געלט, מיט א פאראייניגטע כח הרבים און אפענע פארלאנג פון גדולי אדמור"י ורבני העיר.
בראש המדברים האט אויפגעטרעטן העסקן הנמרץ ר' חיים מאיר מארקאוויטש הי"ו, וועלכער האט אין קורצן ארויסגעברענגט די הייליגע מטרה פון דעם אסיפה, און די עבודת הקודש וואס ליגט אצינד אויף די עסקני הקהילות צו פארזיכערן די מאקסימום הצלחה. דערנאך האט מען פאר א לענגערע צייט דורכגעטון בכובד ראש מערערע פראגעס אנבאלאנגט דעם גרויסן אסיפה, צו פארזיכערן אז אלע קהילות הקודש ווערן טאקע איינגעהילט אין דעם פייערדיגן שטימונג מיט א פעסטע שטיצע פאר דעם פרישן רעוואלוציע.
