מיט וואס א טאג נענטער צום היסטארישן כינוס האדיר "להקהל" איינצופעדימען די נייע מצא טוב רעוואלוציע בקרב יהדות מאנסי, און דערמיט ברענגען א ענדע צום שרעקליכן קריזיס פון הויכע חתונה הוצאות, טוט שטייגן די ווארעמקייט און התעוררות אינערהאלב אלע קהילות הקודש צוגלייך, ווען עס ערשיינט פרישע קול קורא'ס און הייסע רופן פון די רבני העיר, וואס רופן די חברי הקהילות צו זיין א טייל פון דעם רעוואלוציע און היסטארישע כנסיה לשם שמים.
דעם ענדע וואך איז ווידער ערשינען די צענטראלע קול קורא פון אלע רבני העיר, צוגעלייגט מיט די חתימות פון נאך פילצאליגע רבנים. עס רעכנט אריין די רבנים פון אלע גרעסערע קהילות אין שטאט בהוראת הקודש פון זייערע רבי'ס די מנהיגי העדה. עס רעכנט אריין די לאקאלע רבנים פון די קהילות צווישן אנדערע: וויזניץ, סאטמאר, סאטמאר, בעלזא, סקווירא, פאפא, באבוב, באבוב 45, צאנז, צאנז קלויזענבורג. און ווי פארשטענדליך פארמאגט עס די חתימות פון אלע אדמור"י ורבני העיר און דייני הקהילות, וואס זענען אין א היסטארישע שריט פאראייניגט צום דעם זעלטן וויכטיגן אסיפה.
אויסער דעם ערשיינט פילע מודעות און פריוואטע קול קורא'ס, פון די גדולי רבני העיר און דייני הקהילות, וואס טוען אין פערזענליכע בריוון רופן די חברי הקהילה צו אנטייל נעמען ביים היסטארישן אסיפה. הייסע רופן פון מערערע בעלי בתים אנגעזעענע אידן אין די קהילות הקודש און זייערע עסקנים.
