דעם פרייטאג צונאכטס איז הרבנית הצדיקת מוויזניץ קייאמישע תליט"א געווארן אפגעפירט צו די מאונט סיני שפיטאל, נאך וואס עס איז אנטשטאנען א ערנסטע פארערגערונג אינעם געזונט צושטאנד דורכאויס די לעצטע פאר טעג.
די רעבעצין תליט"א איז ליידער זייער נישט געזונט שוין א לענגערע צייט, און איז שוין מערערע מאל געווען שפיטאליזירט דורכאויס די לעצטע פאר חדשים. דעם פרייטאג צונאכטס ווען די מצב האט זיך שטארק פארערגערט האבן די הצלה לייט אפגעפירט די רעבעצין צו די מאונט סיני שפיטאל אין מאנהעטן, וואו די דאקטוירים האבן פעסטגעשטעלט אז עס האנדלט זיך פון א שווערע לונגען אנטצינדונג, און מען האט ארויפגעלייגט א רעספערעיטאר צו פארגרינגערן דעם אטעם.
היינט זונטאג האט זיך די מצב עטוואס סטאביליזירט ב"ה, און מען האפט צו קענען אראפנעמען דעם רעספערעיטאר אין די נאנטע טעג, אידישע קינדער זענען מתפלל לרפואתה, הרבנית פייגא שפרה בת מרים לרפואה שלימה, בתוך שאר חולי ישראל.
אין אנדערע נייעס האט כ"ק אדמו"ר מוויזניץ שליט"א פון לאנדאן געפראוועט דעם שבת אינאיינעם מיטן עלטערן ברודער כ"ק אדמו"ר מוויזניץ שליט"א פון קייאמישע. דער וויזניצער רבי פון לאנדאן געפונט זיך די טעג אין קרית וויזניץ קייאמישע אויף אפרוה, און דעם שבת האט ער מיטגעהאלטן אלע תפילות אין ביהמ"ד הגדול אין שטעטל, און געדאווענט פארן עמוד און געזאגט די קידושים לכבוד די הילולא קדישא פונעם פעטער הרה"ק רבי יודאל'ע מדזיקוב זי"ע. מוצאי שבת איז דער וויזניצער רבי פון קייאמישע אריבערגעקומען לבית האכסניא און אינאיינעם געפראוועט מלוה מלכה בשבת אחים גם יחד.
