אין די יעצטיגע וואכן איז געלאזט געווארן אין גאנג די פאקטישע שריט אין בעפארברייטונג צום אויפבוי פון א פראכטפולע מרכז עולמי פאר חסידי אלכסנדר, אין וואס עס וועט ווערן אויפגעבויעט א שפאגל נייע בית המדרש פאר כ"ק אדמו"ר מאלכסנדר שליט"א, און די פילע חסידים המסתופפים בצל הקודש אינעם עיר התורה והחסידות בני ברק.
די אלכסנדר בית המדרש אויף רחוב אחיעזר אין בני ברק, איז שוין געבויעט געווארן מיט צענדליגע יארן צוריק, און איז שוין לאנג אויסגעוואקסן איר מעגליכקייט ווען אין א פשוטע שבת איז נישטא די מינימאלע פלאץ פאר די תפילות און טישן בצל הקודש, אפגערעדט פון די גרעסערע שבתים און ימים טובים.
אין די לעצטע צוויי יאר איז פארגעקומען מערערע באראטונגען צווישן די עסקנים און ראשי הקהילה, און אצינד איז מען ענדליך אריינגעשפרינגען אינעם פראיעקט צו לאזן אויפבויען א שפאגל נייע בנין בית המדרש וואס וועט פארמאגן אכט שטאק, א ריזן היכל בית המדרש מיט פינף טויזענט סקווער פיס, א גרויסע היכל הטישן, א פראכטפולע מקוה און שטיבלעך, און א הערליכע דירה פארן רבי'ן שליט"א.
פארלאפענע וואך איז פארגעקומען א ספעציעלע אסיפה בביתו נאוה קודש פון כ"ק אדמו"ר מאלכסנדר שליט"א, וואו דער רבי האט ממנה געווען א קבוצה עסקנים אלס חברי וועד קרן הבנין, און אצינד ארבעט מען אויס די גענויע פלענער איבער די אכצן מיליאן דאללערדיגע פראיעקט וואס האלט שוין ב"ה נענטער ווי ווייטער צו ווערן א פאקטישע קאנסטרוקציע זאנע.
