אין די לעצטע געציילטע וואכן האבן חסידי באבוב אויפגענומען מיט פרייד די באריכטן איבער מאסיווע פרישע פראיעקטן וואס זענען אינטערגענומען געווארן צו מרחיב זיין די גבולי הקדושה אויף א גרויסע פארנעם, איש על מחנהו אין פארשידענע אנדערע שטעט.

בראש וראשון איז דעם שבועות געמאלדן געווארן א גראנדיעזע פראיעקט וואס קומט פאר אין סטעטן איילענד, וואו עס ווערט אויפגעבויט א מאסיווע ישיבה קאמפלעקס פאר ישיבה קטנה כרם שלמה ד'באבוב, וואס זענען סטאנצירט די לעצטע צענדליגער יארן אויף די 38'סטע גאס אין בארא פארק, אבער דאס ואת לחצנו זה הדחק שפירט זיך מיט די גרויסע וואוקס פון תלמידים.

דעם קאמפלעקס וועט בעיקר ענהאלטן צוויי ריזיגע בנינים, איינס פאר די ביהמ"ד הגדול, שיעור צימערן, חדר אוכל און הערליכע מקוה, און די צווייטע וועט זיין א גרויסע דארמיטארי בנין - לאור רצון קדשו פונעם באבובער רב שליט"א שוין לאנגע יארן אז די ישיבה קטנה בחורים זאלן שלאפן אינעם ישיבה, והו גולה למקום תורה, און דאס העלפט צו צום הצלחה, בפרט דעם פארטאגס סדר.

אינעם זעלבן צייט איז געמאלדן געווארן אז אין ק"ק באבוב אין לינדען האט מען געשלאסן מקח אויף א ריזיגע בנין פון כמעט 80 טויזנט סקווער פיס וואס זיצט אויף א גרויסע שטח אין שטאט, און וועט באדינען די מוסדות הקדושים וואס וואקסן לשם ולתפארת מיט די קרוב צו 200 באבובער משפחות וואס וואוינען שוין דארט. די דרייפאכיגע בנין איז גיגאנטיש גרויס און האט אפגעקאסט שווערע מיליאנען, א פראיעקט אין וואס דער באבובער רב אליין האט שטארק ארויסגעהאלפן צושטאנד ברענגען.

אינעם בעיסמענט פון די גרויסן באבובער ביהמ"ד, בית מדרשו פונעם מנהיג העדה, טוט מען ארבעטן פלייסיג אויסצוברייטערן די מקוה וואס איז שוין פון לאנג אויסגעוואקסן דעם ציבור, און דאס געדרענג שפירט זיך נישט נאר ערב שבת און יום טוב נאר טאג טעגליך, בבוקר בבוקר. די מקוה וועט פארברייטערט ווערן כמעט דריי מאל אזוי גרויסע ווי די יעצטיגע מקוה און עס איז פלאן צו זיין פארטיג מיט דעם פראיעקט שוין אויף ימים נוראים הבעל"ט.

אויך איז שבועות געמאלדן געווארן אז אין רמה ד' אין בית שמש, וואו עס זענען שוין היינט דא צענדליגער באבובער משפחות, האט מע זיך צוזאמענומגען ע"פ ברכת האדמו"ר מבאבוב צו גרינדן א שטיבל. אויף שבועות האט מען געדינגן א לאקאל אבער אינעם זעלבן צייט ווערט אויפגעשטעלט א ריזיגע גרויסע נייע הערליכע שול, בנין לייבל רובין, וואס וועט שטיין מיט פראטכ להנאת חסידי באבוב, און ום באניץ פונעם גאנצן שכונה.

אחרון חביב קומט באריכטן פון די קעטסקיל בערג, אז 'מחנה שלוה' גרייט זיך צו א מאסיווע פארברייטונג, ווען עס איז שוין אפגעקויפט געווארן געגאנטישע שטחים הארט קעגן איבער דעם יעצטיגן קעמפ, פי כמה אין גרויסקייט פון די יעצטיגע גרויסע קעמפ, וואו עס ווערט דארט פארברייטערט ווערן דעם קעמפ - מיט  א 'טונעל' אינטער די ארטיגע 'היידן ראוד' וואס וועט מקשר זיין ביידע קעמפס אויף א פארזיכערטע פארנעם.

אזוי אויך האלט מען אין די לעצטע פלאנען שטאפלן פאר א נייע הערליכע קעמפ, פאר'ן ישיבה קטנה 'עטרת שלמה ד'באבוב' אין מאנסי, וואו מ'וועט אויפבויען א גאנצע קעמפ פאר די ישיבה, וואו די בחורים וועלן פארברענגען דורכאויס די זוממער וואכן צווישען דעם באשעפער'ס הערליכע נאטור.

ו'בנה א'ותה ב'קרוב ב'ימינו ב'נין