נייער היים איז דעזיגנירט אלס פולשטענדיגע 'לייכטהויז' אין צענטער פון מאנסי וואו יתומים מיט זייערע פאמיליעס קענען פארברענגען אין א געשמאקע און היימליכע אטמסאפער
א פייערליכע מעמד חנוכת הבית איז פארגעקומען דעם פארלאפענעם וואך אינערהאלב דעם הייליגן מוסד אור חדש וואו עס איז באנייט געווארן די נייע "לייכטהויז" אין מאנסי מיט די באטייליגונג פון די חשוב'ע רבני העיר.
א שטראל פון ליכטיגקייט
די לייכטהויז איז נאך א רינגעלע אין דעם קייט פון ענדלאזע פעולות און אקטיוויטעטן וואס ווערן געטון דורכ'ן הייליגן מוסד אור חדש.
אין אלע היימישע געגנטער פארמאגט שוין היינט אור חדש א לאקאציע וואס דינט ווי א לייכט-טורעם פאר די קינדער. די לאנגיעריגע מוסד אור חדש ווערט געפירט אונטערן מנהל המוסד הרב ר' משה שמואל הלוי ראטטענבערג שליט"א, וואס גיבט זיך אוועק בלב ונפש פאר די באשעפערס קינדער. מען קומט זיך דארט צוזאם אויף א רעגלמעסיגע פארנעם צו פארברענגען אינאיינעם מיט די אור חדש חברים/חבר'טעס. עס ווערט דארט צוגעשטעלט גאר רייכע פראגראמען דורך די געטרייע סטעף וועלכע ווארטן אפ די קינדער און פארברענגען מיט זיי. פאר די קינדער איז עס ווי א צווייטע היים; עס ווערט צוגעשטעלט איבערבייס, שפילצייג און פיל מער.
דורכאויס די לעצטע עטליכע יאר האט אור חדש אין מאנסי אפט געדארפט וואנדערן פון איין לאקאציע צום צווייטן, צוליב דעם וואס די צאל קינדער וועלכע האבן זיך געוואלט באטייליגן ביי די רייכע פראגראמען איז כסדר געוואקסן. דערפאר האט מען מיט א שטיק צייט צוריק זיך אריינגעווארפן אינעם פראיעקט אפצוקויפן א רחבות'דיגע, צוויי-שטאקיגע הויז וואס זאל דינען אלס הויפקווארטיר פאר די ענדלאזע אקטיוויטעטן און פראגראמען פון אור חדש.
מיט די הילף פונעם חשוב'ן נדבן הרבני הנגיד הרה"ח ר' זאב יואל גרינצווייג הי"ו, האט מען גענצליך איבערגעבויט דעם הויז. מען האט דארט אריינגעלייגט א ריזן שפיל צימער פאר די קינדער מיט שפילצייג, געימס, און א זאמלונג פון תוכנ'דיגע ביכער. אויך איז דא דארטן א גרויסע קיך וואו די מיידלעך וועלן זיך צוזאמקומען זיך אויסצולערנען באקן און קאכן. אינעם הויף איז אין פלאן אויפצושטעלן א הערליכע פארק וואו די קינדער וועלן קענען פארברענגען מיט געשמאק. ספעציעל איז אריינגעלייגט געווארן גאר אסאך קאפ און מח אינעם אויסשטעל פון דעם דירה, עס זאל דינען אלס באקוועמע, ווארעמע היים.
א ספעציעלער חידוש איז צוגעלייגט געווארן צו דעם מאנסי לאקאל: עס איז אויפגעבויט געווארן אויפן צווייטן שטאק א פראכטפולע אפטיילונג אויסגעשטעלט ווי א באזונדערע הויז מיט שלאף צימערן, וואו אור חדש משפחות וועלן קענען קומען אויף שבתים זיך אויסלופטערן.
דער הויז ווערט באנייט
נאך לאנגע חדשים פון שווערע ארבעט האט מען דעם פארלאפענעם וואך ענדליך דערגרייכט דעם פייערליכע מאמענט ווען מען האט געעפנט די טויערן פונעם "לייכטהויז".
דער מעמד חנוכת הבית איז באשיינט געווארן מיט די השתתפות פון א צאל חשוב'ע רבנים און אדמורי"ם פון מאנסי, אריינגערעכנט כ"ק האדמורי"ם מסקולען מאנסי, ראחמיסטריווקא ספרינג וואלי, זוועהיל, פארשעי, און אויך גאב"ד סאטמאר מאנסי, הרה"ג ר' ישראל דוד שלעזינגער אב"ד שער התפילה, הגה"צ אב"ד פאפא, הגה"צ אב"ד תולדות אהרן, הגה"צ אב"ד סאטמאר מאנסי, הגה"צ אב"ד סאלקא, הגה"צ אב"ד שם משמעון שליט"א - נשיא המוסד, וואס זיי האלטן מיט די הייליגע ארבעט פן דער נאנט.
ווי שיין איז געווען צוצוקוקן די רירנדע מאמענטן ווי די רבני העיר זענען ארומגעגאנגען פון צימער צו צימער און קובע געווען מזוזות ביי אלע שטובער. דערביי האבן די רבנים אנגעוואונטשן גאר ווארעמע ברכות אז מען זאל טאקע ווייטער קענען אויפטון מיט די הייליגע פעולות פון די מוסד. די רבנים האבן אויך באוואונדערט די שיינקייט און די רחבות פון די הערליכע, פראכטפולע צימערן.
די רבנים שליט"א האבן כולם פה אחד ארויסגעהויבן די הייליגע פעולות פונעם מוסד אור חדש וואס פארמאגט א נעץ פון הונדערטער סטעף און וואלונטירן וועלכע באגלייטן די קינדער פערזענליך. מען געבט ארויס גליונות און מען טוט כסדר אפרעכטן רייכע שבתים, הערליכע אויספלוגן, און אינהאלטסרייכע פראגראמען צו דערפרייען די הערצער פון די אומשולדיגע קינדערלעך. אצינד מיט דעם "לייכטהויז" וועט אור חדש קענען נאכמער פארברייטערן די פעולות.
ביים מעמד זענען אויך אנוועזנד געווען א צאל נדבנים און ידידים וועלכע געבן זיך אוועק אויף א רעגלמעסיגן פארנעם פאר די פיבערהאפטיגע פעולות פון אור חדש און האבן געהאלפן מען זאל קענען דערגרייכן דעם יעצטיגער מאמענט. אזוי אויך האבן זיך באטייליגט די אור חדש שטאב וואס יעדע פון זיי כל אחד בשמו הטוב יבורך זענען באקאנט צו זיין גאר אויסגערופענע און ערפארענע מחנכים און זיי געבן זיך איבער דורכאויס די יאר בלב ובנפש פאר אור חדש.
א רייכע דרשה איז געהערט געווארן פונעם נשיא המוסד, הרה"צ ר' יוסף פאלאטשעק שליט"א אב"ד שם משמעון, וועלכע האט ארויסגעברענגט ווי אזוי אור חדש טוט אויפלייכטן די וועלט פון די קינדערלעך אויף א טעגליכע פארנעם.
דערנאך איז געהערט געוווארן אפנהארציגע דיבורים פון איינער פון די חשוב'ע אור חדש סטעף מו"ה אלעזר שטיינבערג הי"ו וועלכע גיבט זיך אוועק מיט הארץ און נשמה די גאנצע יאר. האט מיטגעטיילט זיין פערזענליכע ערפארונג וואס ער זעט ביים ארבעטן אינאיינעם מיט די קינדערלעך און ווי אזוי די פראגראמען פון אור חדש דינען אלס דער הויכפונקט פונעם טאג פאר אזויפיל פאר'יתומ'טע משפחות.
די משא המעמד איז געהערט געווארן פון הגה"צ אב"ד סאלקא שליט"א, וועלכע האט גאר שטארק ארויסגעהויבן די חשיבות פון די אידן וועלכע העלפן ארויס אידישע קינדער אין צייט פון נויט, און אנגעוואונטשן מברכת קדשו.
אין א מאמענט פון הכרת הטוב, איז איבערגעגעבן געווארן א ספעציעלער אות הוכרה פארן נדבן וועלכע האט ערמעגליכט דער גרעסערע טייל פון די הוצאות פונעם נייעם הויז, הרבני הנגיד הרה"ח ר' זאב יואל גרינצווייג הי"ו, וואס בלויז אין זכות פון זיין נדיבות הלב האט מען געקענט דערגרייכן דעם מאמענט.
דער מעמד האט זיך געשלאסן מיט דעם וואס די באטייליגטע האבן באקומען דעם געלעגנהייט צו באטראכטן די הערליכע, ברייטע צימערן און די גרויסע הויף וואס איז אין פלאן אריינצולייגן אינעם "לייכטהויז", וואס טוט שוין אצינד באלייכטן די מאנסיע גאסן, און עס שיינט אריין ליכטיגקייט אין די הערצער פון יתומים און אלמנות.
אור חדש על מאנסי תאיר!
