אין די טעג טוט די מוסד בוני עולם פייערן בסיעתא דשמיא פינף אין צוואנציג יאר זינט די התייסדות, מיט קרוב צו פערצן טויזענט קינדער בלע״ה.
בוני עולם איז היינט א אימפעריע וועלכע האט פליגלעך איבער די גאנצע וועלט, אפיסעס וועלכע שטייען צו הילף צו די מצפים לישועת השם בקרוב, אין יעדע פלאץ ווי עס וואוינען היימישע אידן איז פארהאן א בוני עולם אפיס.
היינט פינף אין צוואנציג יאר נאכן התייסדות, ווען בוני עולם איז שוין א וועלט אימפעריע, וועלכע נעמט אריין אזויפיל חסדים און שמחה פאר אידישע קינדער, איז שווער צו קוקן אויף צוריק צום והיה ראשיתך מצער, ווען בוני עולם איז געווען אין די קליינע וויגעלע און קוים געקענט העלפן געציילטע משפחות.
נאר מיט אזעלכע כוחות און מסירות נפש פון הרב שלמה באכנער שליט״א און טויזענטער עסקנים איבער דער גארער וועלט, און הונדערטער מיליאנען דאללער וועלכע כלל ישראל האט אריינגעגאסן זעהנדיג דעם עמוד האש ההולך לפני מחנה ישראל לנחותם בדרך, ליכטיג צו מאכן אין די טונקעלע שטובער, האט בוני עולם מצליח געווען אנצוקומען צו אזא ליכטיגקייט.
דעם דינסטאג אווענט ערב ראש חודש סיון וועט זיין דער גליקליכער טאג ווען די פילע בוני עולם עסקנים וועלן אפצייכענען מיט פרייד דעם געשעעניש אין די פראכפולע ״ראקלעי״ זאלן, ווי א זעלטענע רייכע פראגראם וועט אפגעהאלטן ווערן.
כ״ה תברכו את בני ישראל, כ״ה יהיה זרעך!
