היינט נאכמיטאג ערשיינט א מאכטפולער אינדארסירונג אין וואס די מנהלים פון אלע היימישע מוסדות התורה אין בארא פארק רופן דעם ציבור צו שטימען פאר ענדרו קאומא אלס מעיאר פון ניו יארק סיטי, אין בעפארברייטונג צו די דעמאקראטישע פריימעריס וואס קומט פאר די קומענדיגע וואך.
די בריוו איז אונטערגעשריבן דורך די מנהלים פון פאלגענדע מוסדות התורה: אלכסנדר, באבוב, בעלזא, באבוב 45, בית יעקב, בית הלל קראסנא, בנות חי', בית שרה, בני תורה, גן ישראל, אמרי אמת וביתיעקב גור, דרכי אבות צאנז, ישיבת צאנז סטעטן איילענד, דרכי חיים, וויזניץ, צמח צדיק וויזניץ, וויען, ישיבה חתן סופר, יגדיל תורה, לעלוב, סאטמאר, סקווירא, סאטמאר, מונקאטש, מבקשי השם, מוסדות טאהש, ספינקא, פאפא, צאנז קלויזענבורג, ראחמיסטריווקא, און תומר דבורה.
אינעם בריוו שרייבן די מנהלי המוסדות אז די פאראייניגטע אינדארסירונג פארן געוועזענער גאווערנער קאומא קומט נאך לענגערע אפהאנדלונגען און אסיפות, ווען דער געוועזענער גאווערנער האט זיך עפנטליך אנטשולדיגט פאר זיין געמיינע אויפפירונג אין לויף פון די קאראנע עפאכע, און פארשפראכן צו ארבעטן אינאיינעם מיט די היימישע ציבור אלס מעיאר. דעריבער אלס די חובת השעה צוליב די ערווארטעטע שמאלע אויסגאנג ווען מ'מוז פארזיכערן נישט אריינצופאלן אונטער אויסגעשפראכענע שונאי ישראל, בעט מען פון יעדן איינעם צו שטימען פאר קאומא אלס מעיאר.
