אן היסטארישע תקופה גייט אריבער אויפן יהדות החרדית אין ניו יארק סיטי, ווען אלע קהילות און מוסדות האבן זיך פאראייניגט מיט איין ציל, און אינדארסירט דעם קאנדידאט ענדרא קאומא פארן קומענדיגן מעיאר פארן עיר ואם בישראל.
מיר אלע געדענקען די גרויזאמע און טרערן-געווייקטע קאוויד תקופה, ווען כלל ישראל האט זיך אנגעליטן פון די סטעיט אויטאריטעטן וועלכע זענען געקומען בשליחות פון גאווערנאר קאומא. מיר האבן נישט פארגעסן ווי די מוסדות התורה זענען געפאלן א קרבן צום סטעיט, און זענען אויסגעשטאנען צרות צרורות באגלייט מיט קנסים און אומצאליגע אויספארשונגען.
שטעלט זיך א ברענעדיגע פראגע, פארוואס?! פארוואס קאומא?!
פארוואס האבן די מוסדות התורה באשלאסן צו אינדארסירן דעם זעלביגן קאנדידאט ענדרא קאומא פאר מעיאר?!
און דער אמת איז דער בעסטער תירוץ.
זיצנדיג אינאיינעם מיט די עסקני הקהילות איז מען געקומען צום החלטה, באטראכטנדיג די שאנסן און מעגליכער אויסגאנג פון די קומענדיגע וואלן. דאס בילד שטעלט זיך ארויס ווי פאלגענד:
דער איציטיגער אמטירנדער מעיאר עריק עדעמס איז א שטארקער אידן פריינט, אבער ער לויפט נישט אין די יעצטיגע פריימערי וואלן און עס איז נישט מעגליך צו שטימען פאר אים.
מצד שני האבן מיר דער צווייט פאפולערסטער קאנדידאט אין דעם פארמעסט איז א וויסטער ליבעראל מיט גאר עקסטרעמע און וואנזיניגע אנשויאונגען. זאהאראן מאמדאני שטעלט זיך ארויס און העצט אן אויפהער קעגן דאס אידישער פאלק. זיינע בעסטע פריינט זענען אט די וועלכע זייען אונז אן חורבנות אין אלע אספעקטן, און זיינע גרעסטע שטיצער זענען די וועלכע ווילן אונז נישט לאזן לעבן במנוחה, הן ברוחניות, און אפילו נישט בגשמיות.
פון די אנדערע זייט האט ענדראו קאומא א לאנגיעריגע קשר מיט די אידישע געמיינדע אין ניו יארק, און קען גוט אונזער לעבענסשטייגער און באדערפענישן, און ער האלט אין איין רעדן מיט די עסקנים איבער זיינע טעותים ביי קאוויד, און זאגט קלאר און אפען אז ער האט געמאכט טעותים ביי קאוויד, און בעט סליחה ומחילה.
ווי אויך געדענקען מיר גוט די צייטן ווען "גאווערנאר קאומא" איז געווען א שם דבר אין גאנץ אמעריקע, און דער אפענער טיר וואס ער האט שטענדיג געהאט פארן יהדות החרדית און אירע אנגעלעגנהייטן. מיר האבן נישט פארגעסן וויפיל פראבלעמען זענען געלעזט געווארן אונטער זיין פריינטליכער פירעשאפט, און וויפיל טובות ער האט געטון פארן כלל און פרט.
מיר קענען זיך נישט ערלויבן אז מאמדאני זאל געווינען!
אויב גייט איר נישט ארויס שטימען, גיבט איר דערמיט אן אפיציעלער שטימע פאר מאמדאני. דערמיט ברייטערט איר אויס די שאנסן אז ניו יארק סיטי זאל פאלן צו רויב פאר די עקסטרעם ליבעראלע גרופעס, אין שפיץ פון א מעיאר וועלכער האט נישט קיין שום שייכות מיט אונזער געמיינדע, אויב עפעס פארקערט.
דאס איז די סיבה פארוואס אלע קהילות ומוסדות שטייען פאראייניגט און אינדארסירן ענדרא קאומא פאר מעיאר.
מיר בעטן בכל לשון של בקשה:
הערט די געשריי פון די עסקנים.
טוה א טובה פאר דיר און דיין עתיד.
אין א שעת גזירה - איז נישטא קיין ברירה
