די עולם התורה האט געליטן א שווערע קלאפ, מיט די פטירה פון הגאון הגדול רבי אליעזר פרייפעלד זצ"ל לאנגיעריגער ריש מתיבתא און ישיבה עץ חיים ווילרייק, און פון די גאר חשובע רבנים אין שטאט אנטווערפן אין בעלגיע.
דער גאון איז געווען דריי און ניינציג יאר אלט, ביים שליסן א רייכע לעבנס קאפיטל פון הרבצת תורה ויראה, געבוירן איז ער אין שטאט לייפציג אין ראמעניע, און ביים צווייטן וועלט מלחמה האט ער מיטגעמאכט שווערע צייטן אונטער די נאציס די רשעים ימ"ש.
שפעטער אלס בחור האט ער געלערנט אין די בארימטע ישיבה אין געיטסהעד, זייענדיג א תלמיד פון הגאון הגדול רבי אליהו אליעזר דעסלער זצ"ל בעל מכתב אליהו משגיח אין ישיבה. נאך די חתונה האט ער אוועקגעשטעלט זיין שיינעם שטוב אין אנטווערפן, וואו ער איז געווען פאררעכנט פון די חשובע רבנים אין שטאט, און פאר לאנגע יארן געדינט אלס רב אין די אייזענמאן בית הכנסת.
צענדליגע יארן נאכאנאנד האט ער מרביץ תורה געווען און פארגעלערנט שיעורים אין ווילרייק ישיבה, וואו ער האט מעמיד געווען תלמידים לאלפים, און מחבר געווען זיין ספר "אמרי אליעזר" אויף פארשידענע ענינים. דעם יו"ט שבועות איז ער נפטר געווארן בשיבה טובה איבערלאזנדיג א הערליכע דור, און די לוויה איז פארגעקומען פרייטאג מיטאג פון די ישיבה אין ווילרייק, אויפן וועג צום בית החיים אין פיטע האלאנד.
