שווערע נייעס הערט מען אצינד פון ארץ ישראל, אז דער לעגענדארער וויזניצער מלחין הרב החסיד המפורסם ר' יצחק אונגאר ז"ל פון קרית וויזניץ בני ברק, איז נפטר געווארן בשיבה טובה אין עלטער פון זעקס און אכציג יאר, זייענדיג אין די מעייני הישועה שפיטאל אין בני ברק נאך א קורצע קראנקהייט פון עטליכע טעג רח"ל.
הרב החסיד ר' יצחק איז געווען פון די געהויבענע וויזניצע חסידים משרידי דור הישן, א פייערדיגער חסיד פון הרה"ק בעל אמרי חיים מוויזניץ זי"ע, וועם ער האט זוכה געווען צו באדינען מיט גרויס געטריישאפט, און גענאסן פון א קירבה יתירה לפני ולפנים. צענדליגע יארן איז ער געווען פון די יושבים ראשונה במלכות אויף וועם אלע חסידים האבן ארויפגעקוקט, סיי אין ארץ ישראל בצל קדשו פון הרה"ק בעל ישועות משה מוויזניץ זי"ע, און סיי אין אמעריקע בצל קדשו פון הרה"ק בעל תורת מרדכי מוויזניץ זי"ע.
ר' יצחק איז באקאנט געווארן איבער די וועלט מיט זיינע וואונדערליכע ניגונים און תנועות, ער האט פארפאסט אריבער טויזענט הארציגע חסידישע ניגונים, וואס נישט אלעס האט ער שוין בכלל ארויסגעגעבן לאור עולם, ער האט געזינגען מיט הארץ און נשמה, ווארעמע, שטייטע ניגונים, און פרייליכע צוגלייך, ווען אין יעדע ניגון איז אריין א ריזן אוצר פון מחשבה און געבעט, לויב און דאנק צום בורא כל עולמים.
זיינע ניגונים זענען פארשפרייט געווארן איבער די גאנצע וועלט, און וואו ער איז אנגעקומען האט ער געזינגען א נייע ניגון און מהנה געווען אידישע קינדער פון זיין רייכן קוואל, כיד ה' הטובה עליו. אלס האט מען געוואוסט אז ווען מען זעהט ר' יצחק וועט מען האבן די געלעגנהייט זיך אויסצולערנען א נייעם ניגון.
זיין כח הנגינה איז בלויז געווען אין צוגאב צו זיין גדלות בתורה, זייענדיג א תלמיד חכם עצום, יושב ועוסק באהלה של תורה. ער האט געקענט א געוואלד בתורה וחסידות, און דערציילט פאר די יונגע דור וואס ער האט מיטגעלעבט ביי די פריערדיגע צדיקים, מיט א זעלטענע געשמאק און אינטערעסע.
ר' יצחק איז געווען א זון פון הרב החסיד ר' דוד יוסף אונגאר ע"ה, און א איידעם ביי הרב החסיד ר' יהושע זאב מעכלאוויטש ע"ה. ער איז געווען א סופר סת"ם און געשריבן כתבי קודש בהידור רב, אויך פלעגט ער דאווענען פארן עמוד מיט א מורא'דיגע ווארעמקייט און מעורר געווען דעם ציבור המתפללים לתשובה ותיקון המעשים.
די לעצטע פאר טעג האט ער ל"ע געליטן א שווערע לונגען אנטצינדונג, און נאך וואס די מצב האט זיך שטארק פארערגערט איז ער יעצט ביינאכט אין ארץ ישראל נפטר געווארן לחיי העולם הבא, איבערלאזנדיג א הערליכע דור ישרים יבורך, חשובע קינדער אין ארץ ישראל און אין אמעריקע, און א אוצר בלום פון טויזענטער ניגונים מיט די חסידישע פלאם וואס וועט ערוועקן זיין לעכטיגע זכרון אין יעדע אידישע שטוב.
די לוויה וועט פארקומען מארגן מיטוואך פארנט פון זיין שטוב אין קרית וויזניץ בני ברק, דערנאך ביים גרויסן ביהמ"ד בית וויזניץ וואו די טויזענטער חסידים וועלן אפגעבן דעם כבוד האחרון.
צווישן די באקאנטע ניגונים וואס ר' יצחק האט פארפאסט, און ווערט געזינגען איבער די גאנצע וועלט, איז א רייע ניגונים אויף מנוחה ושמחה וואס ווערט געזינגען אין וויזניץ און איבעראל, די ניגון ושויתי ה' לקראתי, עד הנה, אודה ה', הודו לה' כי טוב, כאיל תערוג, לעשות רצונך, יהא רעווא קדמך, מלך רחמן, שמך נאה לך, און נאך פילע ניגונים און פזמונים וואס איז נישט מעגליך אויסצורעכענען.
