א וואלקן פון טרויער האט זיך אראפגעלאזט אויף די ספרדישע אידנטום, הויפטזעכליך אין ארץ ישראל, מיט די פטירה פון איינער פון די גדולי וגאוני הדור, הגאון הגדול רבי מאיר מאזוז זצ"ל ראש ישיבת כסא רחמים, וועלכער איז געווען פאררעכנט צווישן די גרעסטע גאונים ביי אחינו בני ישראל הספרדים, און מעמיד געווען שווערע טויזענטער תלמידים דורכאויס די יארן מיט זיין וואונדערליכע כח ההשפעה און הרבצת התורה.
געבוירן איז ער אין לאנד תוניס וואו ער איז אויפגעוואקסן אין זיינע יונגע יארן, ביי זיין פאטער הגאון רבי מצליח מאזוז זצ"ל וועלכער האט אנגעפירט א ישיבה אין תוניס מיטן נאמען "כסא רחמים", פון קינדווייז אן איז ער שוין געווען באקאנט מיט זיין זעלטענע התמדה בתורה און גאונות וחריפות, און אלס אינגערמאן ווען ער איז אנגעקומען קיין ארץ ישראל אין די תש"ל יארן, האט ער איבערגעפלאנצט די ישיבה "כסא רחמים" אינעם עיר התורה והחסידות בני ברק, וואו ער האט אין לויף פון די יארן אויפגעשטעלט צענדליגע טויזענטער תלמידים בדרך התורה והיראה.
דער גאון וראש הישיבה זצ"ל האט פארמאגט א זעלטן רייכע נאטור צו משפיע זיין אויף אנדערע, גאר אסאך פלעגן קומען זיך דורכרעדן מיט אים ליהנות עצה ותושיה, און אזוי איז ער אויסגעשטיגן אלס איינער פון די גרעסטע גאונים ביי די ספרדישע געמיינדע, איבערהויפט ביי די אפשטאמיגע פון תוניס און ארומיגע לענדער, וועלכע האבן געטראפן ביי אים א ריכטיגע ממשיך צו פארזעצן די פארצייטישע מסורה פונעם אלטן אמאל אויפן ריכטיגן נוסח.
טויזענטער אידן פלעגן זיך קלאמערן ביי די גרויסע שיעורים און דרשות, די וועכנטליכע שיעורים מוצאי שבת און אזוי אויך אין פארשידענע געלעגנהייטן, ליידער אבער האט זיך דאס ליכט פארלאשן, און נאך א שווערע קראנקהייט אין וואס דער ראש ישיבה האט זיך געמוטשעט א שטיק צייט ל"ע, איז ער דעם שבת קודש ביום שביעי של פסח נסתלק געווארן לגנזי מרומים, אין עלטער פון אכציג יאר.
דער גרויסער נפטר האט איבערגעלאזט א דור ישרים יבורך, א שיינע משפחה און צענדליגע טויזענטער תלמידים, אלס ממלא מקום ווייטער צו פירן די ישיבה איז געווארן אויפגענומען זיין אינגערן ברודער הגאון רבי צמח מאזוז שליט"א, און נעכטן זונטאג אסרו חג אין ארץ ישראל איז דער גרויסער נפטר געקומען לקבורה אויפן פאנאוויטשער בית החיים אין בני ברק, נאך א גרויסע לוויה מהיכל ישיבתו הק' מיט די באטייליגונג פון טויזענטער אידן פון נאנט און ווייט.
זכר צדיק לברכה לחיי העולם הבא.
