אין די צייט וואס די מדינת ישראל מיליטער האט אונטערגענומען א מאסיווע מיליטערישע אטאקע אויף די נוקלעארע איינריכטונגען אין איראן, הערשט א שטארקע אנגעצויגענקייט איבער די גאנצע וועלט בכלל, און בפרט ביי אחינו בני ישראל בארץ הקודש וואס זענען אין געפאר פון א קאנטער אטאקע יעדע ליאדע מינוט, מיטן האפענונג אז עס זאל נישט שאטן פאר אידישע קינדער אויף סיי וועלכע וועג.
אין ליכט פון די מלחמה צושטאנד איז די לוד לופטפעלד אין ארץ ישראל פולקאם פארשלאסן, פירנדיג דערצו אז שווערע טויזענטער אידן זענען געשטראנדעט אויף די וועגן און שטעגן, און זענען געצווינגען צו פראווענען דעם שבת בערי הגולה אין פארשידענע ערטער.
כ"ק אדמו"ר מקארלין סטאלין שליט"א וועלכער איז נעכטן אנגעקומען צום שטאט מאלינוב אין אוקראינע לרגל די יומא דהילולא קדישא פון זקינו דער הייליגער בית אהרן זי"ע, געפונט זיך אצינד אין לאנד קפריסין אן קיין בגדי שבת, אין די צייט וואס די עסקנים ארבעטן אז דער רבי זאל האבן אלע באדערפענישן לכבוד שבת.
די פליגער פון הגאון הגדול רבי יצחק יוסף שליט"א וועלכער איז געווען אונטערוועגנס אהיים פון א ביקור חיזוק אין קאנאדע, איז פארקירעוועט געווארן קיין רוים אין איטאליע, און פון דארט איז ער געקומען צו פליען קיין אמעריקע וואו ער וועט פראווענען שבת אין פלעטבוש.
הגאון הגדול רבי עזריאל אויערבאך שליט"א וועלכער איז געווען צוגאסט אין אמעריקע אלס אורח הכבוד ביים גרויסן מעמד אדירי התורה, האט היינט געלאנדעט אין לאנד קפריסין נאכן ווערן פארקירעוועט פון לאנדן אין ארץ ישראל.
איבער אלעם ווערט געמאלדן איבער די געפלאנטע מסע הקודש פון די גדולי הדור בארץ הקודש, וואס האבן זיך געגרייט ארויסצופארן אויף די נסיעה קיין אמעריקע צו שאפן צענדליגע מיליאנען לטובת קרן עולם התורה, אז צוליב די שווערע מלחמה צושטאנד איז די נסיעה אפגעשטופט אויף דערווייל, און מען ארבעט אצינד אויס פרישע דעטאלן צו קענען אפרעכטן די נסיעה אין די קומענדיגע תקופה, וויבאלד די עולם התורה איז דריגענד אנגעוויזן אויף די באלדיגע שטיצע פון אחינו בני ישראל בערי הגולה.
חסידי צאנז אין אמעריקע וואס ערווארטן דעם רבינ'ס באזוך דעם זונטאג, זענען נתבשר געווארן אז די מסע הקודש איז אפגעשטופט אויף דערווייל, און מען האפט צו קענען מעלדן די פרישע פלענער ווי אמשנעלסטן כשיעבור זעם.
פאר די פילע בעלזא חסידים וואס זענען ארויסגעפארן קיין ארץ ישראל צו מיטהאלטן די געהויבענע ימי השמחה בחצר הקודש בעלזא, און זענען געבליבן געשטראנדעט אונטערוועגנס נישט קענענדיג לאנדן אין ארץ ישראל, האט כ"ק אדמו"ר מבעלזא שליט"א געהייסן איבערגעבן אז מען זאל צוריק אהיימפארן למקומות מושבותיהם און נישט קומען קיין ארץ ישראל.
אין די זעלבע צייט האט כ"ק אדמו"ר מבעלזא שליט"א געהייסן איבערגעבן פאר אלע נשות החסידות, אז היינט נאכמיטאג בכניסת השבת ווען מען צינדט די שבת ליכט, זאל מען צינדן די ליכט און מקבל שבת זיין דריי מינוט פריער פון די זמן, און זאגן קאפיטל קכ"א און ק"ל פון תהלים צוליב די שווערע מצב.
אין אלע ישיבות און בתי מדרשים בארץ הקודש איז מען מרבה בתפילה אז די שווערע מלחמה זאל נישט קאסטן קיין אידישע קרבנות, און מען זאל נאר הערן גוטע בשורות בקרוב.
